5 sáýirde, «Aqtaý – Túrki áleminiń 2025 jylǵy mádenı astanasy» jylynyń ashylý saltanaty ótti. Aıtýly is-sharaǵa oraı Qazaqstan Prezıdenti Qasym-Jomart Toqaev arnaıy quttyqtaý hatyn joldady.
Memleket basshysynyń quttyqtaýyn QR Mádenıet jáne aqparat mınıstri Aıda Balaeva oqyp berdi.
Prezıdent óziniń quttyqtaý hatynda Aqtaý qalasynyń Túrki áleminiń mádenı astanasy atanýyn elimiz úshin ǵana emes, barlyq baýyrlas túrki memleketteri úshin mańyzdy oqıǵa retinde atap ótti.
«Shejireli Mańǵystaý, qazynaly Ústirt aımaǵy tutas túrki órkenıetiniń ajyramas bóligi sanalady. Kıeli ólkede ultymyzdyń, jalpy túrki dúnıesiniń san ǵasyrlyq rýhanı murasy saqtalǵan. Tarıhy tamyrlas, dástúri sabaqtas halyqtardyń yntymaqtastyǵyn odan ári nyǵaıtý – barshamyzdyń ortaq mindetimiz. Osy ataýly jylda baýyrlastyǵymyzdy bekemdeı túsetin basqosýlar uıymdastyrylyp, mańyzdy sheshimder qabyldanady dep senemin. Túrki memleketteriniń yqpaldastyǵyn arttyrýǵa zor úles qosyp júrgen TÚRKSOI uıymyna jáne osy is-sharany uıymdastyrýshylarǵa shynaıy rızashylyǵymdy bildiremin. Túbi bir túrki jurtynyń birligi nyǵaıa bersin!» – delingen hatta.
Aıta keteıik, saltanatty jıynǵa Ázerbaıjan, Qyrǵyzstan, Túrkııa, О́zbekstan, Túrkimenstan, Vengrııa elderinen mártebeli meımandar qatysty.
Qart Kaspıı jaǵalaýynda ótken aýqymdy is-sharaǵa aımaq turǵyndary men Qazaqstannyń ózge óńirlerinen,shetelden kelgen qonaqtardy qosa alǵanda 30 myńdaı kórermen jınaldy.
Saltanatty sharanyń basty nysandarynyń biri – «Darhan dala» etnoqalashyǵy. Bul – qazaqtyń dástúrin, kıeli Mańǵystaý murasyn jáne túrki halyqtarynyń tarıhyn keńinen nasıhattaýǵa arnalǵan biregeı mádenı keńistik.
Eske sala keteıik, Ázerbaıjanda ótken TÚRKSOI-ǵa múshe memleketterdiń 40-sessııasynda Aqtaý qalasyna Túrki áleminiń 2025 jylǵy mádenı astanasy mártebesin berý týraly sheshim qabyldanǵan bolatyn. Ataýly jyl kóleminde túrki mádenıetiniń rýhyn tereń sezinýge múmkindik beretin túrli festıvalder, konsertter, kórmeler men teatr qoıylymdar josparlanǵan.
Sondaı-aq, TÚRKSOI aıasyndaǵy ataýly jyldar sheńberinde 2025 jyl Qazaqstannyń halyq ártisi, uly kompozıtor jáne dırıjıor Nurǵısa Tilendıev jyly dep jarııalandy.