AQTО́BE. 5 mamyr. Aqtóbe oblystyq ortalyq «Nur-Ǵasyr» meshiti janyndaǵy «Aqtóbe» medresesiniń shákirtteri mereke kúnderi sporttyq oıyndardan jarys ótkizdi. Bul týraly «Nur-Ǵasyr» meshitiniń baspasóz qyzmeti habarlady.
Shara medreseniń 7 jyldyq mereıtoıyna arnaldy. Jastardyń sporttyq sheberligin shyńdaý jáne buqaralyq sportty nasıhattaý maqsatynda uıymdastyrylǵan saıys Alǵa aýdanynyń Bestamaq aýyly men Alǵa qalasynda ótti. Qatysýshylar voleıbol, qol kúrestirý, gir kóterý, arqan tartys, shaǵyn fýtbol, qazaq kúresi, qunan báıge jáne asyq atý syndy sport túrlerinen synǵa tústi.
Búginde atalǵan medresede 65 shákirt bilim alýda. Bıyl bitiretin shákirtteridiń altaýy qyzyl dıplomnan úmitker. Qazaqstan musylmandary dinı basqarmasynyń arnaýly saraptama komıssııasy medrese ustazdarynyń bilimi men biliktiligin tekserip, joǵary baǵalady. Sondaı-aq, osy jyly Almatyda ótken respýblıkalyq medresearalyq olımpıadada «Aqtóbe» medresesiniń 2-kýrs shákirti Ábdijappar Salamattyń 1-oryndy jeńip alǵanyn aıta keteıik.
Satybaldy Sáýirbaı.
Derek: Aqtóbe oblystyq ortalyq «Nur-Ǵasyr» meshitiniń baspasóz qyzmeti.
Sýret: muftyat.kz.