ASTANA. 5 mamyr. Boston marafony kezinde jarylys uıymdastyrdy dep aıyptalǵan Djohar Sarnaev kezekti sot otyrysynda emosııasyn tejeı almaı, kózine jas aldy. Mundaı jaıt eki jyldan astam ýaqyt boıy jalǵasyp jatqan sot prosesi kezinde alǵash ret tirkeldi. Bul týraly BBC habarlady.
Keshe Boston federaldy sotynda kezekti sot otyrysy ótip, onda aıyptynyń týystary kýáger retinde qatysty. Sarnaevtyń týys ápkesi Patımat Sýleımanova sot kezinde kóńili bosap, ózine qoıylǵan suraqtarǵa tolyq jaýap bere almady. Sol kezde sýdıa onyń ózine kelýi úshin suraq qoıýdy úze turý týraly sheshim shyǵardy. Dál osy sátte kóńili bosaǵan Djohar Sarnaev ta kózine kelgen jasyn súrtti.
Sot otyrysyna kýáger retinde bes týysy qatysty. Olardyń barlyǵy Djohardy 8 jasynda ata-anasymen birge AQSh-qa ketkennen keıin kórmegenin aıtty. Týystarynyń biri Sarnaevtyń bala kúninde óte meıirimdi bolǵanyn esine aldy. Tipti ol Djohardyń «Patsha arystan» mýltfılmin kórip otyryp, jylap alatynyn da aıtyp berdi.
Sotqa qatysqan barlyq týysy alqabıler sotyn baýyrlarynyń ómirin saqtap qalýǵa shaqyrdy.
Aıta keteıik, aǵaıyndy Tamerlan jáne Djohar Sarnaevtar 2013 jyldyń sáýir aıynda dástúrli Boston marafony kezinde jarylys uıymdastyrdy. Nátıjesinde 3 adam qaza taýyp, 264-i ártúrli deńgeıdegi jaraqat aldy. Tamerlan Sarnaev ustaý operasııasy kezinde qaza tapty. Al qolǵa túsken 21 jastaǵy Djohar Sarnaev ólim jazasyna kesilýi múmkin.
Búginde aıyptalýshynyń advokattary da onyń jarylysqa qatysy bar ekenin moıyndady. Alaıda, olar negizgi uıymdastyrýshy aǵasy – Tamerlan bolǵanyn alǵa tartýda.
Osy jyldyń sáýir aıynda alqabıler soty uzaq keńesten keıin Djohar Sarnaevty oǵan taǵylǵan aıyptardyń 30 pýnkti boıynsha aıypty dep tapqan bolatyn.
Elaman Qońyr.
Derek, sýret: BBC.