Elimizdegi alǵashqy kópultty «Birlik» án-bı ansambli Aqtaýda ótken «Túrki bıiniń yrǵaǵy» halyqaralyq festıvaliniń sahnasynda óner kórsetti. Ártister áıgili «Qara jorǵany» bılep, kórermen de qosyla ketti.
«Birlik» ansamblimen birge festıvalǵa taǵy segiz shyǵarmashylyq ujym qatysty. Olar – ár ulttyń rýhy men dástúrin sahnada beınelep júrgen jandar. Halyqaralyq TÚRKSOI uıymynyń Bas hatshysy Sultan Raev atap ótkendeı, bul festıval – tájirıbe almasý men shabyttanýǵa, ortaq mádenı qundylyqtardy bólisýge múmkindik bergen erekshe alań boldy. Is-shara bıyl Aqtaýǵa berilgen «Túrki áleminiń mádenı astanasy» mártebesi aıasynda ótti.
«Birlik» ansambli byltyr qurylǵan bolatyn. Ujym quramyna kastıng nátıjesi boıynsha iriktelgen 20 úzdik bıshi men mýzykant endi. Shyǵarmashylyq toptyń basty maqsaty – álem halyqtarynyń mádenı murasyn saqtaý jáne nasıhattaý, dástúrli mýzyka men bıdi kópshilikke tanytý. Ansamblge halyqaralyq baıqaýlardyń laýreaty Anel Marabaeva jetekshilik etedi. Sondaı-aq qoıylymdar men horeografııalyq kompozısııalar daıyndaý barysynda tájirıbe almasý úshin jaqyn shetelderden tanymal horeograftar shaqyrylady.
Bıyl Aqtaýda 30-dan astam halyqaralyq mádenı jáne shyǵarmashylyq bastama ótkizý josparlanǵan. Atap aıtsaq, festıvaldar, ǵylymı konferensııalar, kórmeler men baıqaýlar uıymdastyrylady. Atalǵan is-sharalar túrki álemi elderi arasyndaǵy mádenı yntymaqtastyqty damytýǵa zor úles qosady.