Qostanaı oblysynda bir kúnde tańdaı qaqqyzar eki birdeı aýyl sharýashylyǵy kásiporny jumysyn bastady. Oblysta jyldyń birinshi jartysynda 6 ınvestısııalyq joba paıdalanýǵa berilýge tıis. Onyń bireýi óndiristen de, qalǵan beseýi aýyl sharýashylyǵyn damytýǵa baǵyttalǵan. Qostanaı aýdanyndaǵy “Jas qanat” qus fabrıkasynyń qyzyl lentasyn oblys ákimi Sergeı Kýlagın qıdy.
– Jergilikti bazarda azyq-túlik molshylyǵyn jasaý, jumys ornyn ashý, salyq túsirý –ınvestısııalyq jobalardy júzege asyrýdaǵy negizgi maqsat. Al mundaı jobalardyń on biri ómirge joldama alsa, kelesi jyly bitýge tıis tórt jobanyń qazyǵy qaǵyldy, – dedi Sergeı Kýlagın.
Bul kásiporynnyń qurylysy men jabdyǵyna 598 mıllıon teńge qarjy jumsaldy. Munda 80 adam qus ósirip, qanatty qazynadan nápaqasyn tabatyn bolady. Germanııalyq jabdyq balapandardy torda ustamaı, erkindikte jemdeýge arnalǵan. Respýblıkadaǵy ındýstrııalandyrý kartasyna engen bul qus fabrıkasy jylyna 2 myń tonna qus etin óndiredi.
– Kásiporyn óndirgen qońdy qus eti jergilikti bazarǵa shyǵarylady. Azyq-túlik molshylyǵyna úles qosyp ǵana emes, onyń arzandaýyna da atsalysamyz. Bizdiń fabrıka óndirgen qus eti bazardaǵy naryqtan kem degende 15 paıyzǵa arzan bolady. Fabrıkanyń oblys ortalyǵynyń irgesinde onalasýy, tasymalǵa shyǵynnyń az jumsalýy da ónimniń ózindik qunynyń arzandaýyna múmkindik berip otyr,–deıdi “Jas qanat” qońdy qus fabrıkasy” jaýapkershiligi shekteýli seriktestiginiń atqarýshy dırektory Irına Kıseleva. Sonymen qatar “Jas qanat” jylyna qazynaǵa 150 mıllıon teńge salyq salatyn bolady.
Fedorov aýdanyndaǵy “Turar ” jaýapkershiligi shekteýli seriktestiginiń jańa úlgidegi saýyn fermasyn salyp jatqanyna úsh jyldaı ýaqyt bolǵan edi. Saýyn sıyrlar turatyn keshen qurylysynyń barlyq qarjysyn aýyl sharýashylyǵy kásipornynyń ózi kóterdi. Bul ınvestısııalyq jobanyń ereksheligi bolyp sanalady.
– Aýyldy malsyz qalaı elestete alasyń? Mal sharýashylyǵyn biz burynǵy taptaýryn joldan alyp shyqqymyz keldi. Damyǵan elderdegi sııaqty sút óndirýde nege kompıýterlik jańa tehnologııaǵa kóshpeımiz? Osy oıymyzdy júzege asyrý úshin aldymen qurylysty bastaý kerek boldy,–deıdi “Turar” jaýapkershiligi shekteýli seriktestiginiń dırektory Qaırat Ospanov.
Keshen qurylysy seriktestikke 377 mıllıon teńgege tústi. Keń de jaryq bazalarda qara sıyrlar baılanbaı, erkin júredi. Sút saýý keshendi jabdyǵyn “Qazagro” ulttyq basqarý holdıngi aksıonerlik qoǵamy Germanııadan aldyrdy. Munda qazir 500 sıyr saýylady. Jaqynda qurylysy bitetin kelesi bazaǵa taǵy da 500 sıyr ákelinetin bolady. Úzdik tehnologııanyń artyqshylyǵy sol, álgi 500 sıyrdy úsh saýynshy ǵana saýady. Olar “karýselde” aınalyp bara jatqan sıyrdyń jelinin sýly shúberekpen tazartyp, saýý apparatyn kıgizip turady. Bir sıyrdy saýýǵa 15 mınýttaı ǵana ýaqyt ketedi. Al keshende saýynshylardyń jýynatyn, demalatyn bólmesi, laboratorııa, sút saqtaıtyn jabdyq ornalasqan. Jylyna sharýashylyqta 6 myń tonna sút óndiriletin bolady. Ol Qostanaı qalasyndaǵy sút zaýyttaryna jiberiledi.
“Turar” jaýapkershiligi shekteýli seriktestigi oblysta germanııalyq ozyq tehnologııany júzege asyryp otyrǵan úshinshi sharýashylyq. Ol aýyldaǵy 20 adamǵa jumys berip otyr. Osy jerdegi “Shańdaq” keńsharynyń toz-tozy shyqqan naryq jyldary aýyl áıelderi sútti kompıýterlendirilgen apparatpen saýamyz dep oılap pa? Al Qaırat Ospanovtyń sharýashylyqty keńeıtý oıynda bar.
Názıra JÁRIMBETOVA.
Qostanaı oblysy.