Búginde «Oskar» júldesi – álemdegi eń bedeldi kıno marapaty sanalady. «Mýzeı faktov» saıtynyń málimetinshe, bul syılyqtyń anımasııa salasyndaǵy arnaıy atalymy — «Úzdik tolyqmetrajdy anımasııalyq fılm» — alǵash ret 2002 jyly ǵana resmı engizildi. Biraq oǵan deıin de erekshe týyndylar nazardan tys qalǵan joq. Solardyń biri – Ýolt Dısneıdiń aty ańyzǵa aınalǵan «Aqshaqar men jeti gnom» mýltfılmi.
Bul týyndy 1937 jyly jaryq kórgen. Anımasııanyń jasalýy – sol kezeń úshin úlken táýekel edi. Sebebi tolyq metrajdy mýltfılmge kórermen qyzyǵa qaraı ma, joq pa – ol ýaqytta beımálim bolatyn. Alaıda Ýolt Dısneı bul jobasyna sendi, stýdııasyn qarjylyq qıyndyqtarǵa qaramastan alǵa jeteledi. Sonyń nátıjesinde «Aqshaqar men jeti gnom» anımasııa ónerinde betburys jasaǵan tabysty mýltfılmge aınaldy.
Osy eńbegi úshin 1939 jyly Ýolt Dısneıge erekshe formattaǵy «Oskar» syılyǵy tabys etildi. Naqtyraq aıtsaq, bir úlken músin jáne jeti kishkentaı statýetka. Bul – mýltfılmniń ataýyna saı, sımvoldyq máni bar erekshe rásim boldy. Marapat resmı túrde «Kınematograftyń jańa óner túrin dúnıege ákelgeni úshin jáne mıllıondaǵan kórermenge qýanysh syılaǵany úshin» dep tabystaldy.