Almatyda «ULY DALA ÚNI» halyqaralyq vokaldyq-hor festıvali bastaldy, dep habarlaıdy Egemen.kz.
Atalmysh is-shara Qurmanǵazy atyndaǵy Qazaq ulttyq konservatorııasynda ótip jatyr. Oǵan Qazaqstan men Reseıden kelgen 30-dan astam kásibı jáne áýesqoı hor ujymy qatysýda.
Úsh kúndik baǵdarlamada hor mýzykasynyń konsertteri, jetekshi sarapshylardyń sheberlik sabaqtary, dóńgelek ústelder men shyǵarmashylyq kezdesýler uıymdastyrylady.
Arnaıy shaqyrylǵan mamandar arasynda Qazaqstannyń eńbek sińirgen qaıratkeri, B.Baıqadamov atyndaǵy akademııalyq kapellanyń kórkemdik jetekshisi – Beıimbet Demeýov, professor, Qazaq ulttyq konservatorııasynyń dırıjerlik bóliminiń meńgerýshisi – Ǵalymjan Berekeshev, Máskeý konservatorııasynyń kameralyq horynyń kórkemdik jetekshisi, professor – Aleksandr Solovev bar.
Festıvaldiń maqsaty – ónerpazdardyń oryndaýshylyq sheberlik deńgeıin kóterý jáne hor óneriniń Qazaqstannyń materıaldyq emes mádenı murasynyń mańyzdy bóligi retindegi rólin atap ótý.
Festıvaldiń negizgi is-sharasy – 18 sáýirde E.Rahmadıev atyndaǵy úlken zalda ótetin Gala-konsert. Konsertte jetekshi akademııalyq jáne kórkemónerpazdar ujymdary, balalar ujymdary men tanymal ansamblder óner kórsetedi. Baǵdarlamada qazirgi qazaq hor mektebiniń, sondaı-aq álemdik hor mýzykasynyń klassıkteri shyǵarmalarynyń premeralary usynylady.