ShYMKENT. 5 mamyr. Ońtústik Qazaqstan oblysynda aýyldyq emhana qyzmetkerleriniń balalardy alyp Syrdarııa ózeni ústinde qaıyqpen serýen qurýlarynyń aqyry qaıǵyly aıaqtaldy. Orta mekteptiń 8-synybynda oqıtyn eki oqýshy sýǵa ketip qaldy. Bul týraly Ońtústik Qazaqstan oblysy tótenshe jaǵdaılar departamenti habarlady.
Qaıǵyly oqıǵa ótken jeksenbi kúni oryn alǵan. Aýyl dárigerleri tobynyń bul qydyrysynda zardap shekken taǵy 24 jastaǵy medbıke, 7 jasar ul bala men 5 jasar qyz qazir Saryaǵash aýdandyq aýrýhanasynyń jansaqtaý bóliminde jatyr.
Sol kúni dárigerler otbasy múshelerimen birge tabıǵattyń aıasynda demalýǵa barady. Eresekter ózderiniń soryna qaraı, dál qaıtardyń aldynda balalardy qaıyqpen serýendetpekshi bolady. Osylaısha motorly qaıyqqa bes bala, medbıke jáne qaıyqshy otyrady. Sýdyń ústinde óziniń sheberligin kórsetkisi keldi me, qaıyqshy bir kezde qaıyǵyn kilt buryp jiberedi. Sol kezde qaıyq aýdarylyp ketedi. Budan qaıyqshy men bir oqýshy ǵana din-aman shyǵady. Al sýǵa ketip qalǵan eki oqýshynyń denesi kelesi kúni ǵana tabylady. Basqa serýenshiler áýpirimmen aman qalady. Qazir dárigerler olardyń ómirleri úshin kúresip jatyr.
Qazir anyqtalǵandaı, qaıyqshy sol kezde qyzý bolǵan. Al qaıyǵynyń aqaýy bar eken.
Baqtııar Taıjan.
Derek, sýret: Ońtústik Qazaqstan oblysy tótenshe jaǵdaılar departamenti.