Alǵash ret 1967 jyly ashylǵan «Mańǵystaý» temirjol vokzalyna arada otyz jyl ótkende ishinara jóndeý jumysy júrgizilgen eken. Týrızmdi damytýdy basym baǵyt etip qoıǵan Mańǵystaýda qonaq kútýge, alys-jaqynnan kelgen týrısterge sapaly qyzmet kórsetýge mindettilik bar. Osy oraıda atalǵan qurylys jumystary Memleket basshysy Q.Toqaevtyń tapsyrmasyna oraı týrızm salasyn jandandyrý maqsatynda ınfraqurylymdyq nysandardy damytý baǵytynda qolǵa alyndy.
763 sharshy metr aýmaqqa ornalasqan «Mańǵystaý» temirjol vokzaly kesheniniń aýmaǵyn ulǵaıtý barysynda «Qazaqstan temirjoly» UK teńgerimindegi 2 gektarǵa jýyq jer telimi memleket menshigine qaıtarylyp, qazirgi tańda súrý jumysy bastaldy, rekonstrýksııalaý jumysyna baılanysty «Mańǵystaý» temirjol vokzaly ýaqytsha janyndaǵy bos ǵımaratqa aýystyryldy.
Kólik mınıstrliginiń málimetinde jarııalanǵandaı, elimizdiń barlyq óńirinde 125 temirjol vokzalyn qaıta jańǵyrtý jumystary bastalǵan bolsa, Mańǵystaý oblysy «Mańǵystaý» stansasyndaǵy temirjol vokzalyn jóndeý jumysy osy jańǵyrtýdyń aıasynda qolǵa alynǵan.
Mańǵystaý oblystyq jolaýshylar kóligi jáne avtomobıl joldary basqarmasynyń basshysy Adaıbek Qalıevtiń aıtýynsha, «Mańǵystaý» temirjol vokzalyn jańartý jumysyn bıyl jyl sońyna deıin aıaqtaý josparlanǵan, jumysqa ázirge 150-ge jýyq jumysshy jumyldyrylyp otyr.
Mańǵystaý óńirinde temirjol vokzaldarynyń jaǵdaıy máz emes – shaǵyn beketterdi aıtpaǵanda, aty dardaı vokzaldardyń ózi kózge qorash, eskirgen, zamanaýı talaptarǵa saı kelmeıdi. Mádenıettiń bosaǵadan bastalatynyn eskersek, bul týrızmdi damytamyn degen óńir úshin qolaısyzdyq týdyratyny belgili. Ásirese oblys ortalyǵy Aqtaý qalasyna jolaýshy qabyldaıtyn «Mańǵystaý» stansasyndaǵy vokzaldyń jupyny hali turǵyndardy kópten tolǵandyryp júrgen edi. Bıyl el Úkimetiniń qoldaýymen Mańǵystaýda bir emes úsh vozkalǵa – «Beıneý», «Shetpe», «Mańǵystaý» vokzaldaryna kúrdeli jóndeý jumysy júrgiziledi. Úsheýi de kúre joldyń boıyndaǵy eń iri ortalyqtar, Aqtaýǵa poıyzben kelemin degen jolaýshy Beıneý men Shetpe arqyly jetedi.
Aldymen qolǵa alynǵan «Mańǵystaý» stansasyndaǵy vokzaldy jóndeý jobasy barysynda vokzaldardyń ishki jáne syrtqy kelbetin tolyq jańartýmen birge servıstik ınfraqurylymy ózgertilmek. Bul jóninde Mańǵystaý júk tasymaly bólimshesiniń dırektory Nájimeden Ǵubashov aıtyp berdi.
– Keshendi jańǵyrtý barysynda kassalar, anyqtama orny, dárethanalar múmkindigi shekteýli jandar úshin qoljetimdi bolady. Sondaı-aq kótergish qurylǵylar, taktıldi jolaqtar, ındýksııalyq panelder ornatylyp, arbalar jańartylady. Jańa dámhana ashý, vendıng apparattaryn ornatý, saqtaý kameralaryn keńeıtý, demalys bólmelerin jáne «Ana men bala» bólmelerin uıymdastyrý, kútý zaldaryn tegin Wi-Fi jelisimen jabdyqtaý josparlanǵan, dedi Mańǵystaý júk tasymaly bólimshesiniń dırektory Nájimeden Ǵubashov.
Mańǵystaý oblysy