Ýkraına tóńiregi týraly daý taǵy da kún tártibine kóterildi. AQSh prezıdenti Donald Tramptyń Qyrymǵa qatysty aıtqan batyl pikiri jahandyq sarapshylardyń nazaryn aýdardy. Tramptyń aıtýynsha, Ýkraına kóshbasshysy Vladımır Zelenskıı beıbit kelisim úshin Qyrymdy Reseıge berý múmkindigin qarastyryp otyrǵan kórinedi. Buǵan deıin Kıev tarapynan mundaı usynystar úzildi-kesildi qabyldanbaǵany belgili. Sonymen V. Zelenskıı «bastan qulaq sadaqa» dep halyqtyń beıbitshiligi úshin jerinen bas tartýy múmkin be álde soǵysty jalǵastyra bermek pe? Osy máseleni álemdik BAQ júıesi arqyly saralap, arnaıy zerdelep kórdik.
AQSh Prezıdenti Donald Tramp ýkraınalyq áriptesi Vladımır Zelenskııdiń beıbit kelisim aıasynda Qyrymdy Reseıge berýge daıyn ekenin málimdep otyr. Onyń aıtýynsha, Kıev buǵan deıin mundaı usynystardy úzildi-kesildi qabyldamaǵanymen, qazirgi jaǵdaıda kózqarasy ózgerip jatqanǵa uqsaıdy.
«Ýkraına basshysy anneksııalanǵan ońtústiktegi túbegin Reseıge berýge kelise me?» degen BAQ ókilderiniń suraǵyna Donald Tramp «Men solaı oılaımyn» dep qysqa jaýap berdi. Sondaı-aq Aq úı basshysy Reseı Prezıdenti Vladımır Pýtınge úndeý jasap, kelisimge kelýge yjdaǵat qylýyn surady. Onyń saraptaýynsha, bul jumys eki aptaǵa ǵana sozylady.
Bul sózderin Tramp Rım Papasyn jerleý rásiminen qaıtqanda aıtyp berdi. Sol sapar aıasynda ol Ýkraına Prezıdentimen júzdesken bolatyn. Tramp kezdesýdiń jaqsy ótkendigin, Qyrym máselesi óte qysqa sóz bolǵanyn jetkizdi.
Ýkraına bıligi buǵan deıin birneshe ret jer máselesine qatysty eshqandaı ymyraǵa kelmeıtinin aıtyp kelgen edi. Kıev tarapynan aıtylǵandaı, aýmaqtyq máseleler tek atysty toqtatý týraly kelisimge qol jetkizilgennen keıin ǵana talqylanýy kerek.
Ázirge ne Zelenskıı, ne Pýtın Tramptyń bul sózderine resmı jaýap bergen joq.
Bul arada Germanııanyń qorǵanys mınıstri Borıs Pıstorıýs Ýkraınaǵa eskertý jasap otyr. Ol jergilikti ARD telearnasyna bergen suhbatynda Kıevke «amerıkalyq prezıdent usynǵan jolǵa» túsýdiń qajeti joq ekenin aıtyp, mundaı kelisimniń «kapıtýlıasııaǵa» teń bolatynyn atap ótti. Mınıstrdiń aıtýynsha, Ýkraına beıbit kelisim úshin keıbir terrıtorııalarynan aıyrylýǵa májbúr bolýy múmkin ekenin túsinedi. Alaıda, Pıstorıýstyń pikirinshe, «olar mundaı úlken jeńildikterge barmaýy tıis».
О́tken aptada Donald Tramp kópshilikke negizgi kelisim tarmaqtarynyń basym bóligi kelisilgenin málimdegen edi. Alaıda VVS dereginshe, AQSh usynǵan sońǵy jospardyń naqty mazmuny áli belgisiz.
Reuters agenttiginiń habarlaýynsha, AQSh ázirlegen qujattarda Qyrymnyń Reseıge tıesili ekenin zańdy túrde moıyndaý usynylǵan. Oǵan qosa, Ýkraınanyń NATO-ǵa múshelikke kirý múmkindigi alynyp tastalyp, Ulybrıtanııa men Fransııanyń basshylyǵymen qurylǵan qaýipsizdik kepildigi koalısııasy qurylýy kózdelgen. Eýropalyq tarap bolsa AQSh-tan Ýkraınany qorǵaý jóninde NATO úlgisinde naqty ári senimdi kepildik berýin talap etip otyr.
Sonymen qatar AQSh josparyna sáıkes, qazirgi tańda Reseı baqylaýyndaǵy Zaporoje atom elektr stansasyn halyqaralyq basqarýǵa berý usynylǵan. Bul stansa eki tarapqa da elektr qýatyn jetkizýi múmkin. Alaıda eýropalyqtar jasaǵan qarsy josparda Reseıge energııa berýdi qarastyrý máselesi joq.
Time jýrnalyna bergen suhbatynda Tramp Ýkraınadaǵy soǵystyń bastalýyna Kıevtiń NATO-ǵa qosylýǵa umtylýy sebep boldy degen pikirin taǵy qaıtalady. Sondaı-aq «Qyrym Reseı quramynda qalady», dep shegeledi.
Aıta keteıik, qazirgi ýaqytta Reseı Ýkraına jeriniń shamamen 20 paıyzyn baqylap otyr.