Qaraǵandy oblysynda «Ortalyq» óńirlik qolbasshylyǵynyń 6505 áskerı bóliminiń áskerı qyzmetkerleri erlik tanytty, dep jazady Egemen.kz.
Efreıtorlar Ashat Baıseıtov, Qydyrbaı Erlan, Vıacheslav Qojahmetov jáne 3 synyp serjanty Mıhaıl Býbnov qyzmetke bara jatqan jolda Dolınka kentindegi turǵyn úıdiń órtenip jatqanyn baıqap qalady.
Áskerıler esh oılanbastan oqıǵa ornyna dereý jetip, órt shalǵan úıge kirdi. Olar ishte qalǵan úsh balany qaýipsiz jerge alyp shyqty. Tek balalardy ǵana emes, úı ishindegi jarylys qaýpi bar 50 lıtrlik gaz ballonyn da syrtqa shyǵaryp, úlken apattyń aldyn aldy.
– Bul – bizdiń mindetimiz! Biz órt shalǵan úıdi baıqap, birden kómek kórsetýge kiristik. Bul áreketimizdi erlik dep sanamaımyz, bul — bizdiń qyzmetimizdiń bir bóligi, — deıdi ulandyqtar.
Áskerı qyzmetkerlerdiń batyl ári shapshań áreketteriniń arqasynda qaıǵyly jaǵdaıdyń aldy alyndy. Olar azamattyq boryshtaryn abyroımen oryndap, naǵyz erlik úlgisin kórsetti.