Memleket basshysynyń tapsyrmasyna sáıkes, elimizde zańsyz ıemdenilgen aktıvterdi qaıtarý esebinen áleýmettik mańyzy bar ınfraqurylym nysandaryn salý isi júzege asyrylyp jatyr.
Úkimet Shyǵys Qazaqstan oblysy Shemonaıha aýdany, Volchanka aýylynda dárigerlik ambýlatorııa salý jumystaryn aıaqtaýǵa Arnaýly memlekettik qordan shamamen 67 mln teńge bólý týraly sheshim qabyldady.
Jobanyń jalpy quny 419 mln teńgeni quraıdy. Qarajattyń bir bóligi buryn Úkimet rezervinen jáne oblystyq bıýdjetten bólingen.
Búgingi tańda nysannyń qurylysy 65%-ǵa oryndaldy. Injenerlik jelilerdi – sýmen jabdyqtaý, elektr energııasy jáne kommýnıkasııalardy júrgizý boıynsha jumystar atqarylýda. Tapsyrý 2025 jyldyń mamyryna josparlanǵan.
Buǵan deıin Memleket basshysynyń tapsyrmasy boıynsha Úkimet Arnaýly memlekettik qordan О́skemendegi gematologııa ortalyǵynyń qurylysyn aıaqtaýǵa 33,6 mlrd teńge bólgen edi.
Aıta ketý kerek, Qazaqstanda «Aýylda densaýlyq saqtaýdy jańǵyrtý» ulttyq jobasy aıasynda 655 nysannyń: medısınalyq jáne feldsherlik-akýsherlik pýnktter, dárigerlik ambýlatorııalar qurylysy josparlanǵan. Búginde 467 nysannyń qurylysy aıaqtaldy. Alǵashqy medısınalyq-sanıtarlyq kómek nysandaryn salýǵa jáne aýrýhanalardy rekonstrýksııalaýǵa qarajat respýblıkalyq bıýdjetten bólinedi. Budan basqa, qarjylandyrý Arnaýly memlekettik qordan da júrgiziledi. Premer-mınıstr densaýlyq saqtaý mınıstrligi men ákimdikke qalǵan 188 medısınalyq nysannyń qurylysyna jáne aýrýhanalardyń qaıta qurylýyna apta saıyn monıtorıng júrgizýdi tapsyrdy.