Májilis tóraǵasy Erlan Qoshanov Majarstan Memlekettik jınalysynyń Qazaqstanmen yntymaqtastyq jónindegi tobynyń jetekshisi Shandor Fazekash bastaǵan delegasııamen kezdesti.
Majar depýtattaryn qarsy alǵan Erlan Qoshanov Qazaqstan men Majarstandy berik strategııalyq seriktestik baılanystyratynyn atap ótti.
– Qazaqstan Eýropalyq odaqtaǵy strategııalyq áriptesimiz Majarstanmen tyǵyz yntymaqtastyqty joǵary baǵalaıdy. Baýyrlas elderimizdi táýelsizdik, tatýlyq pen ulttyq mádenıettiń ortaq qundylyqtary biriktiredi. Ortaq tarıhı muramyz jemisti dıalog pen san saladaǵy yqpaldastyqqa arqaý bolyp keledi. Bizdiń kóshbasshylarymyzdyń arasyndaǵy senimdi qarym-qatynas – osynyń kepili. Prezıdentimiz Qasym-Jomart Toqaevtyń 2024 jylǵy qarashada Býdapesht qalasyna jasaǵan alǵashqy memlekettik sapary strategııalyq áriptestigimizdiń 10 jyldyǵymen tuspa-tus kelýiniń sımvoldyq máni bar, – dedi Májilis tóraǵasy.
Erlan Qoshanov Májilis Majarstan Memlekettik jınalyspen parlamentaralyq baılanysty damytýǵa úlken mán beretinin basa aıtty. О́tken jyly Býdapesht qalasyna sapar barysynda eki el parlamentteri arasyndaǵy yntymaqtastyq týraly kelisimge qol qoıylyp, ekijaqty qarym-qatynasty damytýǵa berik negiz boldy. Sondaı-aq palata spıkeri majar depýtattarynyń Qazaqstanmen parlamentaralyq dostyq toby aıasyndaǵy belsendi jumysyna nazar aýdaryp, Shandor Fazekashty Qazaqstanmen dostyq tobynyń tóraǵasy bolyp saılanýymen quttyqtady.
О́z kezeginde Shandor Fazekash majar qypshaqtarynyń qazaq halqyna ystyq sálemin jetkizdi. Onyń aıtýynsha, qazir olar Majarstanda 50-ge jýyq eldi mekende turyp jatyr ári ata-babalarynyń tarıhı otanymen baılanysyn erekshe baǵalaıdy.
– Bizge túp-tamyrymyzdyń bir bolýynyń máni zor. Osy derekti, osy murany bolashaq urpaqqa jetkizýge tyrysamyz. 1990 jyldan bastap tarıhı baılanysymyzdy qaıta ornatyp, elderimiz ben halyqtarymyz arasyndaǵy qarym-qatynasty qalpyna keltire bastadyq, muny shynymen joǵary baǵalaımyz. Majar qypshaqtary jáne búkil majar halqy úshin Qazaqstannyń táýelsiz el bolýy mańyzdy. Qazir órkendegen memleketke aınalyp kele jatyr. Sonyń arqasynda biz dıplomatııa, ekonomıka jáne mádenıet salalarynda berik baılanys ornata aldyq, – dedi Majarstan delegasııasynyń basshysy.
Taraptar aýyl sharýashylyǵy, ekologııa, mádenı-gýmanıtarlyq baǵyttarda yntymaqtastyqty damytý perspektıvalaryn talqylady.
Májilis tóraǵasy elderimizdiń Túrki memleketteri uıymy men TúrkPA aıasyndaǵy jemisti yqpaldastyǵyn, Eýropa Keńesi Parlamenttik Assambleıasy jáne basqa da kópjaqty qurylymdar aıasynda majar áriptestermen baılanysty damytýdyń mańyzdylyǵyn atap ótti.
Kezdesý sońynda Erlan Qoshanov Memleket basshysy Qasym-Jomart Toqaevtyń atynan Qazaqstan men Majarstan arasyndaǵy dostyq pen yntymaqtastyqty nyǵaıtqany úshin Shandor Fazekashqa II dárejeli «Dostyq» ordenin tabys etti.