«Uly tulǵalar» ǵylymı-ǵumyrnamalyq serııasymen jaryq kórgen «Baýyrjan Momyshuly» jınaǵynda erligi elge ańyz bolǵan batyrdyń Qyzyl Armııa qataryna alynyp vzvod, rota komandıri, polk shtaby basshysynyń kómekshisi, Qazaq áskerı komıssarıaty nusqaýshysy qyzmetterin atqaryp ysylǵanyn baıandaıdy. Al Ekinshi dúnıejúzilik soǵys bastalǵanda qolbasshy Baýyrjan sol jıǵan tájirıbesine súıenip 316 atqyshtar dıvızııasynyń (keıinirek Panfılov atyndaǵy 8 gvardııalyk dıvızııa) jasaqtalýyna belsene atsalysyp, osy bólim quramynda batalon, polk komandıri, keıin dıvızııa komandıri retinde Máskeý týbinde, Kalının maıdanynda erligimen dańqy shyǵady. Batyr babamyz soǵystan keıin de on jyldaı áskerı qyzmette bolyp, Voroshılov atyndaǵy akademııany, Keńes Armııasy Bas Shtabynyń janyndaǵy Joǵary áskerı akademııany aıaqtap, osy áskerı oqý oryndarynda generaldarǵa sabaq berip, ustazdyq etedi.
Bar ǵumyryn Otanǵa arnaǵan batyrǵa resmı «Halyq qaharmany» ataǵy berilmegen. Kózi tirisinde «Keńes Odaǵynyń Batyry» dańqy buıyrmaǵan. Bul ataq 1990 jyldyń 12 jeltoqsanynda Baýyrjan Momyshuly dúnıe salǵannan keıin 8 jyldan keıin ǵana beriledi.
«Halyq qaharmany» ataǵy Táýelsiz elimizdiń joǵary dárejeli erekshelik belgisi. Osy erekshelik belgisiniń sıpattamasynda:
«Halyq qaharmany» ataǵy Qazaqstan Respýblıkasyna sińirgen asa úzdik eńbegi, onyń bostandyǵy men táýelsizdigi jolyndaǵy jaýyngerlik erlikteri úshin beriledi», dep túsindiriledi. Sıpattamaǵa tolyq saı bolmys ıesine qatysty osy jaıt jıi-jıi sóz bolǵanmen, oń sheshim áli de shyqpaǵan. Bul máselemen batyrdyń urpaqtary da betpe- bet kelip júr. Batyrdyń kelini Zeınep Ahmetova tuńǵysh Prezıdenttiń «Táýelsizdik dáýiri» atty kitabynda Baýyrjan Momyshulyna osy ataqtyń berilgeni týraly aıtylǵanda otbasy atynan jaýapty organdarǵa saýal joldanǵanyn «Jas Alash» gazetinde jarııalanǵan materıalda egjeı-tegjeıli tarqatady.
«2018 jyldyń aqpan aıynda otbasymyzǵa qadirli bir kisi habarlasty. Aman-saýlyqtan soń: «Sender ylǵı Báýkeńdi Halyq qaharmany ataǵyn alǵan joq deýshi edińder, al elbasynyń «Táýelsizdik dáýiri» degen kitabynda Báýkeń bul ataqpen marapattalǵandardyń basyn bastap tur ǵoı», dedi. Tańyrqaǵan otbasy anyq-qanyǵyn bilmekke túsinderme hat suratady. Saýalǵa sol kezdegi Mádenıet jáne sport mınıstrligi bylaı jaýap beredi:
«Qurmetti Erjan Bahytjanuly!
…Baýyrjan Momyshulynyń el tarıhynda erliktiń eren úlgisin kórsetken dańqty tulǵa retinde alar orny erekshe. Bul turǵyda B.Momyshulyna memleket jáne jurtshylyq tarapynan birqatar marapattar men ataqtar berilgen. Elbasynyń 2017 jyly shyqqan «Táýelsizdik dáýiri» atty kitabynda elimizdiń jańa tarıhy, egemen memleketimizdiń negizi qalanǵan kúnnen bastap, onyń qalyptasý kezeńderiniń erekshelikteri men táýelsizdik dáýirindegi ishki jáne syrtqy syn-qaterlerdi eńserýge baılanysty qabyldanǵan sheshimderdiń mán-mazmuny men tetikteri egjeı-tegjeıli jazylǵan. Atalǵan kitapta Qazaqstan Respýblıkasy aldyndaǵy kórnekti eńbegi, onyń táýelsizdigi men azattyǵy jolynda óshpes erlik kórsetkeni úshin marapattalǵan tulǵalar týraly da keń túrde baıandalǵan. Osy oraıda halyq arasynda Baýyrjan Momyshuly eldiń batyry, halyq qaharmany dep atalyp ketkendikten, kitapta jazylǵan atalǵan marapat dańqty tulǵanyń resmı emes jalpy tarıhı bolmysyn jan-jaqty aıshyqtaý úshin kórsetilgen dep sanaımyz», degen jaýap keledi.
Iá, jaýapta taıǵa tańba basqandaı baıandalǵan - resmı emes. Tuńǵysh Prezıdent kitabynda naqty berilgeni aıtylǵan. Qate derekterdi aqıqatqa aınaldyrý úshin «Halyq qaharmany» ataǵyn berý suralǵanda, Momyshulyna «Keńes Odaǵynyń Batyry» ataǵy berilgeni alǵa tartylǵan.
Asylynda halqy qaharman dep bilgennen bolar tulǵanyń atymen «Halyq qaharmany» tirkesi qosa aıtylady. Bul - qarapaıym jurtshylyqtyń batyrǵa degen qurmetinen týǵan izgi oıy. Dese de resmı dáıegi joq - «Halyq qaharmany» ataǵyn memleket tarapynan berý bolashaqqa qaǵaz bolyp jetetin tarıh úshin, urpaq úshin mańyzdy mánde qala bermek.