2024-2025 oqý jylynda orta bilim berý uıymdaryndaǵy pedagogter sany 412 myńǵa jetken. Bul ótken jylmen salystyrǵanda 14 myńǵa kóp. Oqý-aǵartý mınıstrligi osylaısha, Qazaqstan mektepterinde pedagog tapshylyǵy joıylǵanyn málimdedi, dep jazady Egemen.kz.
«Pedagogtar sanynyń artýy elimizdiń orta bilim berý júıesindegi kadr tapshylyǵyn joıýǵa múmkindik berdi. Búginde elimizdegi muǵalimderdiń 73%-y joǵary biliktilik sanatyna ıe. Bul - kásibılik pen bilim sapasynyń mańyzdy kórsetkishi», dedi Oqý-aǵartý mınıstrliginiń resmı ókili Mereke Amangeldiqyzy.
Prezıdenttiń bastamasymen bıyl alǵash ret birden eki muǵalimge «Eńbek Eri» ataǵy berilgen. Taǵy 36 muǵalim memlekettik nagradalarmen marapattalyp, 64-i «Úzdik pedagog» dep tanylǵan. Olardyń barlyǵy memleketten 1000 aılyq eseptik kórsetkish mólsherinde 3,5 mıllıon teńgeden astam syıaqy alǵan.