1 maýsymda Prezıdenttik jastar kadr rezervine (PJKR) kezekti irikteý bastalady. Osyǵan oraı Memlekettik qyzmet isteri agenttiginiń tóraǵasy Darhan Jazyqbaı jýrnalısterge arnaıy baspasóz máslıhatyn ótkizdi. Brıfıngte bıylǵy irikteýdiń erekshelikteri aıtyldy.
Prezıdenttik jastar kadr rezervi – daryndy, bastamashyl jáne kásibı bilikti jastardy memlekettik basqarý júıesine tartýǵa baǵyttalǵan. Memleket basshysy Qasym-Jomart Toqaevtyń tikeleı bastamasymen iske asqan strategııalyq joba búginde elimizdiń basqarý júıesin jańǵyrtýda tyń serpin berip keledi.
Buǵan deıin bul bastamaǵa 2019, 2021 jáne 2023 jyldary jalpy 60 myńnan asa jas qyzyǵýshylyq tanytty. Irikteýler qorytyndysy boıynsha rezervke 400 adam qabyldandy. Qazir olardyń 318-i jaýapty qyzmetterge taǵaıyndaldy. Atap aıtqanda, 167-i – ortalyq memlekettik organdarda, 37-i – jergilikti atqarýshy organdarda, 62-i – ulttyq kompanııalarda, 52-i ózge uıymdarda qyzmet atqarady. Sondaı-aq 39 rezervshi saıası laýazymdarda, úsheýi – «A» korpýsynyń laýazymdarynda, ekeýi – Májilis depýtaty, bireýi máslıhat depýtaty bolyp el damýyna óz úlesterin qosyp júr.
D.Jazyqbaıdyń aıtýynsha, bıylǵy irikteýdiń basty ereksheligi – ár baǵyt boıynsha kandıdattardyń birkelki sanyn qamtamasyz etý maqsatynda ár kezeńde proporsıonaldy irikteý ótkizý. Iаǵnı rezervtiń ár salalyq baǵyty boıynsha kvotalar qarastyrylyp, irikteý sol salalyq baǵyt boıynsha ǵana júrgiziledi. Bul ádis salalar arasyndaǵy teńgerimdi qamtamasyz etip, naqty baǵyttar boıynsha úmitkerler irikteledi.
– Bıyl aqpan aıynda ótken «Jańa adamdar» jastar forýmynda Memleket basshysy «Prezıdenttik jastar kadr rezervi suranysqa ıe jobaǵa aınaldy. Keleshekte memleketti basqarýshylardyń negizgi legi osy jas mamandardan qalyptasady» degen edi. Aldaǵy ýaqytta da PJKR mańyzy arta beredi. Endi biz kezekti tórtinshi irikteýdi ótkizýdi josparlap otyrmyz. Irikteý Prezıdent Jarlyǵymen bekitilgen erejelerge sáıkes 6 kezeńnen turady jáne maýsym-qazan aılarynda ótkiziledi. Kandıdattarǵa qoıylatyn jalpy talaptar buǵan deıin ótkizilgen irikteýdiń talaptary sııaqty, ıaǵnı kandıdattardyń jasy 35-ten aspaýy, joǵary biliminiń, bes jyldan kem emes eńbek ótiliniń jáne qazaq tilin meńgerýi V1 deńgeıinen tómen emes bolýy týraly talaptar saqtalady, – dedi Memlekettik qyzmet isteri agenttiginiń tóraǵasy.
Irikteý memlekettik apparattyń salalyq kadrlarǵa qajettiligin eskere otyryp, ınfraqurylym, ónerkásip jáne saýda saıasaty, agroónerkásiptik keshen jáne qorshaǵan orta, syrtqy saıasat jáne ınvestısııalar, ekonomıkalyq jáne qarjylyq saıasat, sıfrlandyrý, áleýmettik saıasat jáne azamattyq qoǵam syndy 6 negizgi sala boıynsha júrgiziledi. Kandıdat tirkelý kezinde kórsetilgen salalyq baǵyttardyń birin tańdaýy qajet.
Qujattardy qabyldaý 1-30 maýsym aralyǵynda pkrezerv.gov.kz resmı platformasynda onlaın rejimde júzege asyrylady. Irikteýdiń obektıvtiligin qamtamasyz etý úshin kandıdattardyń derekteri jeke nómir berý arqyly jasyrylady. Baǵalaýshylar úshin úmitkerdiń kim ekeni beımálim bolady.
Mátindik jáne sandyq aqparatpen jumys isteý qabiletin baǵalaý testileý proktorıng júıesimen, aýdıo jáne beınefıksasııamen ótedi. Talaptarǵa sáıkes keletin barlyq kandıdattyń mátindik aqparatpen jumys isteý qabileti baǵalanady. Bul rette sandyq testileýge ár salalyq baǵyt boıynsha eń kóp ball jınaǵan kandıdattardyń 50%-y jiberiledi.
Sıtýasııalyq tapsyrmalardy sheshý kezeńi – kandıdattardyń tańdaǵan salalyq baǵyttaryna baılanysty naqty problemalardy sheshý boıynsha usynystaryn baǵalaýdy kózdeıdi. Bul kezeń onlaın-rejimde esse jazý formatynda ótedi.
Assessment-ortalyǵy men quzyretter boıynsha suhbat oflaın formatta, Prezıdent janyndaǵy Memlekettik basqarý akademııasynda uıymdastyrylady. Munda úmitkerler minez-qulyq ındıkatorlary jáne kásibı quzyretter boıynsha toptyq jáne jeke tapsyrmalardan ótedi. Onlaın formattaǵy jeke suhbat kásibı HR-menedjerlermen ótkiziledi.
– Sarapshylyq komıssııamen áńgimelesý arnaıy komıssııamen suhbattasý túrinde júzege asyrylady. Onyń qorytyndysy boıynsha 100-den aspaıtyn kandıdattar tizimi Ulttyq komıssııa otyrysyna usynylady. Nátıjesinde, úzdik 50 kandıdat Prezıdenttik jastar kadr rezervine qabyldanady. Irikteýdiń ashyqtyǵy men ádildigin qamtamasyz etý maqsatynda kandıdattardy baǵalaý nátıjeleri olardyń jeke kabınetinde jáne kezeń qorytyndysy boıynsha aqparat resmı saıtta jarııalanady. El múddesine qyzmet etemin degen belsendi jas azamattardy Prezıdenttik jastar kadr rezervine qatysýǵa shaqyramyn. Bilimdi, eńbekqor, otanǵa qyzmet etýdi paryz sanaıtyn jastar – elimizdiń turaqty damýynyń basty qozǵaýshy kúshi. Jastardyń bilimin, áleýeti men kúsh-jigerin el ıgiligi úshin tıimdi paıdalaný, qoǵamdyq múddelerge negizdelgen kásibı memlekettik qyzmetshilerdiń jańa býynyn qalyptastyrý – agenttik jumysynyń basty baǵyttarynyń biri, – dep túıindedi D.Jazyqbaı.