Astanadaǵy №109 orta mektepte «№109 mektepke – 109 kún!» atty merekelik is-shara ótti. Jańa oqý ordasy osy jyldyń qańtar aıynda ashylǵan edi.
Mereke oqý ordasynyń alańynda bastalyp, shattyqqa toly mýzykamen árlendi. Áýeli mektep dırektory Janar Ermuhambetova bilim oshaǵynyń qysqa ýaqyt ishinde qol jetkizgen jetistikterin atap ótti.
Is-shara barysynda mektep oqýshylarynyń orkestri «Kelinshek» kúıin oryndap, 3-4 synyp balalary ásem bı bıledi. Bı sońynda jetkinshekter 109 sanyn beınelep, mereke mánin erekshe jetkizdi. Mektep aýlasyna 109 tal kóshet otyrǵyzyldy.
Mazmundy jıyn aıasynda mektep psıhologi R.Muhamedına men eńbek páni muǵalimi N.Baıtúgelova bastamasymen ashylǵan «KórkemARU» klýbynyń tusaýkeseri ótti. Munda 5-8 synyp qyz balalary qolóner men aspazdyqtyń qyr-syryn úırenedi. Kabınetti Qazaqstannyń eńbek sińirgen qaıratkeri, «Tegińdi bilgen – tektilik» qoǵamdyq birlestiginiń tóraıymy Sáýle Jeldibaeva ashyp, aq batasyn berdi. Sonymen qatar «Mektep tynysy» kórmesinde oqýshylardyń qolymen jasaǵan robottary men buıymdary qoıyldy. Sondaı-aq jetkinshekter ulttyq oıyndar men sport túrlerinen sheberlikterin kórsetti. Buǵan kelgen qonaqtar da qatysty.
Mereke sońynda jınalǵan qaýym ustazdar men oqýshylardyń konserttik baǵdarlamasyn tamashalap, jyly áserge bólendi.
Farıza IZBASAROVA,
L.N.Gýmılev atyndaǵy Eýrazııa ulttyq ýnıversıtetiniń stýdenti