Jambyl oblystyq kópbeıindi onkologııa jáne hırýrgııa ortalyǵynyń dırektory Jandos Seıdahmetovtiń bastamasymen onkologııalyq aýrýlardy anyqtaýda asa mańyzdy sanalatyn dıagnostıkalyq ádistiń túri – ekspress-gıstologııa iske qosyldy.
Ortalyqta jylyna 800-den astam ota jasalady. Buryn pasıentke medısınalyq saraptaý qorytyndysyn qoıý úshin onyń gıstologııalyq taldaýy Almaty jáne Astana qalalaryna jiberilip, qorytyndysyn kútý úshin 2-3 apta ýaqyt ketetin. Gıstologııalyq zertteý nátıjesi kelmeıinshe, naýqasqa em taǵaıyndaý da múmkin bolmaıtyn.
Ekspress-gıstologııa – ota kezinde alynǵan tin úlgisin jedel túrde muzdatyp, mıkroskoppen zertteýge múmkindik beretin zamanaýı ádis. Ol nebári 15–20 mınýt ishinde nátıjeni anyqtap, operasııa barysyna dereý ózgeris engizýge jaǵdaı jasaıdy. Mundaı tehnologııa hırýrgııanyń dáldigin arttyryp qana qoımaı, emniń tıimdi strategııasyn tańdaýǵa múmkindik beredi.
Ortalyq mamandarynyń ádisti meńgerý boıynsha biliktilikteri jetildirilip, tájirıbe almasýlardan ótti. Aldaǵy ýaqytta onkologııalyq aýrýlardy 15-20 mınýtta anyqtaıtyn ádistiń arqasynda bul dertti emdeýge tıimdilik te joǵarylymaq.