QYZYLORDA. 6 mamyr. Bıylǵy kóktemde Qyzylorda oblysy boıynsha 7 ret senbilik ótkizilip, aǵash kóshetteri otyrǵyzyldy. Bul týraly egemen.kz tilshisi habarlady.
Buǵan qosa, 18 sáýir kúni «Búkil qazaqstandyq aǵash otyrǵyzý kúni» aksııasy ótkizildi. Atalǵan shara oblystyń barlyq deńgeıdegi eldi-mekenderinde júrgizilip, oǵan aýmaqtyq, oblystyq, qalalyq, aýdandyq mekeme qyzmetkerleri jáne úkimettik emes uıymdar, jastar birlestikteriniń músheleri qatysty. Aksııaǵa oblys boıynsha barlyǵy 24 myńǵa jýyq adam jumyldyrylyp, 69 myńnan asa aǵash kóshetteri egildi.
Al aımaqtaǵy «Tazalyq aıynyń» aıaqtalýyna 10 kún qaldy. Alaıda, aýdandarda áli kúnge deıin arnaıy kommýnaldyq mekemeler jumysy jolǵa qoıylmaı keledi. Tazalyq sharalaryna nemquraıly qaraǵan qala turǵyndary men mekeme basshylaryna 500-den astam aıyppul salynyp, 1000-nan asa eskertý jasalǵan.
Tazalyq saqtaý jumystaryna kóńili tolmaǵan oblys ákimi Qyrymbek Kósherbaev tazalyq aılyǵyn 29-shy maýsymǵa deıin uzartý týraly sheshim qabyldady. Sondaı-aq, aımaq basshysy Syr eli ajarlanyp, kelbettene túsýine jaǵdaı jasaý árbir turǵynnyń mindeti ekenin aıtty. Tıisti sala basshylaryna barlyq aýdandardy aralap, kógaldandyrý, kórkeıtý jumystarynyń barysyn qadaǵalýdy, qaldyqtardy tastaıtyn polıgondardy salý jumysyn tezdetýdi tapsyrdy. Árbir syrboıylyq ózi turyp jatqan mekenine degen jaýapkershiligin sezinip, janashyrlyq tanytyp, aınalasyn tazalap, senbilikterge belsene qatyssa, árbir aýla, kóshe taza da kórikti bolary sózsiz.
Erjan Baıtiles.
Derek: egemen.kz.
Sýret: muftyat.kz.