1 maýsym – Halyqaralyq balalardy qorǵaý kúnine oraı Ulttyq ulannyń avıasııalyq bazasynda «Bala — elimizdiń bolashaǵy» atty merekelik is-shara uıymdastyryldy, dep habarlaıdy Egemen.kz aqparat agenttigi.
Sharaǵa qatysqan búldirshinder úshin mazmundy ári qyzyqty baǵdarlama usynyldy. Atap aıtqanda, jedel maqsattaǵy brıgadanyń kınologtary jattyqtyrǵan «Samýraı» atty qyzmettik ıttiń arnaıy qoıylymy kórermender kóńilinen shyqty.
Is-shara barysynda búldirshinder tas jolǵa sýret salyp, án men bı saıystarynda óner kórsetti. Balalar An-74, An-26, Y8 ushaqtaryn, sondaı-aq Mı-8 jáne Mı-171 tikushaqtaryn óz kózderimen kórip qana qoımaı, olardyń kabınalaryna kirip, otyryp kórdi. Sonymen qatar áskerı brondy jáne patrýl mashınalarynyń ishine de enip, ózderin naǵyz sarbazdardaı sezindi. Bul tehnıka túrleriniń arasynda tek áskerı maqsatta ǵana emes, sonymen qatar arnaıy operasııalar barysynda qoldanylatyn tehnıkalar da boldy.
Sonymen qatar Ulttyq ulannyń Án-bı ansambli ertegi keıipkerleriniń qatysýymen sahnalyq kórinister usynyp, balalarǵa erekshe áser syılady. Anımatorlar daıyndaǵan qoıylymdar men bı fleshmoby da balalardyń belsendi qatysýymen ótti.
— Ulttyq ulan qolbasshylyǵy áskerı qyzmetshilerdiń otbasyna únemi kóńil bólip otyrady. Búgin balalarymyz túrli qyzyqqa keńeldi. Ata-ana retinde aıtar alǵysymyz zor, — dedi is-sharaǵa qatysýshy Gaýhar Bagasharova.
Oıyndar men baıqaýlarda belsendilik tanytqan balalarǵa Qazaqstan Respýblıkasy Ishki ister mınıstriniń orynbasary – Ulttyq ulannyń Bas qolbasshysy Ańsaǵan Baltabekovtiń atynan alǵys hattar men syılyqtar tabystaldy.
Kishkentaı qonaqtar Ulttyq ulannyń áskerı qyzmetshileri daıyndaǵan bul merekelik sharadan kóterińki kóńil-kúımen tarqasty.
Aıta keteıik, balalar nazaryna usynylǵan «Barys» 6 × 6, «Alan-2», sondaı-aq jaýyngerlik qorǵanys deńgeıi joǵary «Cobra II» brondy mashınalary bıylǵy elordada ótken áskerı paradqa qatysqan bolatyn.