Ulttyq mýzeı qory birqatar jádigermen tolyqty. Erekshe tarıhı jáne mádenı qundylyqtardy mýzeıge «Qaıtarylǵan aktıvterdi basqarý kompanııasy» JShS tapsyrdy.
Saraptamalyq qorytyndyǵa sáıkes bul jádigerler temir dáýiriniń erte kezeńi men orta ǵasyrǵa b.z.d. VII ǵasyrdan b.z. III ǵasyryna deıingi kezeńine jatady jáne ejelgi kóshpeli halyqtardyń mádenıetine tán. Atap aıtqanda, saqtardyń «ań stılinde» jasalǵan. Qolónerdiń bul túri kórkemdik sheberliktiń joǵary deńgeıimen erekshelenedi, sonymen qatar skıfterdiń kórshi halyqtar – grek, parsy, qytaılarmen tyǵyz mádenı baılanysta bolǵanyn dáleldeıdi.
Ulttyq mýzeı qoryna tapsyrylǵan buıymdardyń ishinde búrkittiń basy beınelengen metall buıym, arab jazýy bar júzik, múıizdi ań beınelengen (taý ústinde) tik buryshty plastına, qanatty arystan, pyraq (qanatty jylqy), qarǵyǵan barys pen buǵynyń músinderi, 15 kóne tıyn, shıyrshyq túrindegi eki júzik, arystannyń basy beınelengen saqına jáne basqa da sırek zattar bar. Jádigerlerdiń jalpy salmaǵy 118 gramnan asady. Buıymdar shekime, bederleý jáne naqyshtaý ádisterimen jasalǵan. Sarapshylardyń aıtýynsha, bul dala mádenıetiniń stılıstıkalyq erekshelikteri men grek, parsy jáne shyǵys óneriniń yqpalyn kórsetedi.
«Bas prokýratýra janyndaǵy Aktıvterdi qaıtarý komıteti men Qarjy mınıstrliginiń Memlekettik múlik jáne jekeshelendirý komıtetiniń úılesimdi jumysynyń nátıjesinde ulttyq ıgilik retinde tanylǵan qundy zattar resmı túrde memlekettik menshikke berilip, Ulttyq mýzeı qoryna tabystaldy. Bul – Memleket basshysy atap ótken mańyzdy qaǵıdattyń jarqyn dáleli. Iаǵnı árbir qaıtarylǵan aktıv el ıgiligine jumsalýǵa tıis. Búgin biz osy qaǵıdattyń naqty júzege asqanyna kýá boldyq. Bul aktıv halqymyzdyń mádenı murasynyń bir bóligine aınaldy», dedi «Qaıtarylǵan aktıvterdi basqarý kompanııasy» JShS bas dırektory Qýanyshbek Muqash.
Jýyrda osy artefaktiler Ulttyq mýzeıdiń ekspozısııalaryna qoıylyp, kópshiliktiń nazaryna usynylady.