Elimizde alǵash ret Abaı atyndaǵy Ulttyq opera jáne balet teatrynyń sahnasynda álemdegi eń kóne ári eń ataqty konserttik roıal óndirýshileriniń biri – «Bösendorfer» brendiniń roıali tanystyryldy. Áıgili kompanııanyń tarıhy eki ǵasyrǵa jýyq ýaqytty qamtıdy.
Qazaq ónerindegi eleýli is-shara Astana jáne Almaty qalalarynda alma-kezek jalǵasyp ótti. Sıqyrly saz tógilgen mýzyka aspabyn el sahnasyna aldyrýǵa uıytqy bolǵan is-sharanyń resmı seriktesi, elimizdegi «Bösendorfer» brendiniń ókili «Raıno» JShS dırektorlary – Erjan Qushanov pen Rahım Toqsanbaev.
Tanystyrylym aıasynda brendtiń kóshbasshylyq ónimi — «Bösendorfer 280 Vienna Concert» konserttik roıali kórsetildi. Bul aspap kúsheıtilgen rezonanstyq dekasymen jabdyqtalǵan jáne venalyq dástúr men zamanaýı tehnologııalardyń minsiz úılesimin beıneleıdi. Buǵan deıin atalǵan brend el naryǵynda buryn-sońdy usynylmaǵan edi.
Roıalderdiń alǵashqy úlgileriniń biri Ahmet Jubanov atyndaǵy Respýblıkalyq mýzyka mektebine ornatyldy. 2025 jyly jasalǵan jańa modeldiń uzyndyǵy – 2,8 metr jáne bul qazirgi ýaqytta elimizdegi eń uzyn konserttik roıal.
«Bul — bizdiń aýstrııalyq áriptesterimizben qolǵa alǵan alǵashqy jobamyz. Bıyl bul aspaptardy oqý oryndaryna, konserttik uıymdarǵa jáne mýzykalyq mektepterge keńinen jetkizýdi josparlap otyrmyz», dep atap ótti kompanııa ókili Rahım Toqsanbaev.
Atalǵan tanystyrylym elimizdegi mýzykalyq mádenıet pen kásibı bilim berýdiń damýyna mańyzdy úles qosady. «Bösendorfer» brendiniń elge kelýi ustazdar men stýdentter jáne konserttik oryndaýshylar úshin shyǵarmashylyqtyń jańa múmkindigin ashpaq.
Is-shara jabyq formatta, arnaıy shaqyrylǵan qonaqtardyń qatysýymen, kameralyq atmosferada ótti. Mártebeli meımandardyń qatarynda «Bösendorfer» kompanııasynyń bas dırektory S.Grıýbmıýller jáne brendtiń top-menedjment ókilderi boldy. Bul kezdesý halyqaralyq brend pen elimizdiń mádenı ınfraqurylymy arasyndaǵy kásibı dıalogti nyǵaıtý turǵysynan asa mańyzdy oqıǵaǵa aınaldy.
ALMATY