Qostanaı óńirinde el avtoónerkásibiniń jańa dáýiri bastalýǵa taıaý. Elimizdiń ónerkásip tarıhyndaǵy eń iri ınvestısııalyq jobalardyń biri sanalatyn – KIA kompanııasynyń avtokólik zaýytynyń qurylysy aıaqtalýǵa jaqyn. Bul – tek kólik óndirisin jolǵa qoıý emes, sheteldik alpaýyttarmen birlesken ónerkásiptik kooperasııany jańa deńgeıge kóteretin mańyzdy qadam, dep jazady Egemen.kz.
Osy aptada zaýyt aýmaǵynda buqaralyq aqparat quraldaryna arnalǵan baspasóz týry ótip, jýrnalıster óndiris alańyn aralap, jobanyń aýqymy jáne aldaǵy josparlarmen tanysty. Joba 2023 jyldyń qarashasynda bastalǵan bolatyn. Qurylys jumystary qazirgi tańda tolyq aıaqtalyp, tehnıkalyq ınfraqurylym men qurylǵylardy ornatý sońǵy satysyna jetken.
KIA zaýyty – Ońtústik Koreıa avtoóndirýshisiniń Qazaqstanda tikeleı ınvestısııa salǵan alǵashqy jobasy. Jobanyń jalpy quny 105 mıllıard teńgeni quraıdy. Bolashaqta zaýyt jylyna 70 myń avtokólik shyǵara alady. Bul – ishki naryqty qamtamasyz etip qana qoımaı, eksporttyq áleýetti arttyratyn óndiris.
«Prezıdent KIA markaly avtokólikterdi usaq torapty ádispen qurastyrý jelisiniń iske qosylý rásimine qatysa otyryp, ónerkásiptik kooperasııany keńeıtý men ınjenerlik bazany qalyptastyrýdyń mańyzdylyǵyn atap ótti. Bul – avtoóndirýshi konsernniń Koreıa Respýblıkasynan tys jerde birlesken kásiporynǵa tikeleı ınvestısııa quıǵan alǵashqy tájirıbesi. Sonymen qatar, zaýyt iske qosylǵannan keıin 1 500 jańa jumys orny ashylady», dedi aımaq basshysy.
Zaýyttyń óndiristik korpýsy 96 myń sharshy metrdi qamtıdy. Munda bes iri seh – dánekerleý, kýzov boıaý, plastık boıaý, qurastyrý jáne qosalqy bólshekter qoımasy ornalasqan. Sonymen birge ákimshilik-tehnıkalyq ǵımarattar men logıstıkalyq alańdar tolyq qamtylǵan.
Metallokonstrýksııalar ornatylyp, ǵımarattyń syrtqy bóligi sendvıch-paneldermen qaptalǵan. Ońtústik Koreıa men Qytaıdan 800-den astam konteınermen qajetti jabdyqtar jetkizilgen. Dánekerleý sehyndaǵy qurylǵylar tolyq ornatylyp, boıaý jelilerin montajdaý jumystary aıaqtalýǵa jaqyn. CKD (usaq torapty) jáne DKD (iri torapty) qurastyrý jelileri ázir tur.
Bıylǵy shilde aıynda alǵashqy pılottyq kólikter qurastyrylady. Al tolyq óndiris jelisi 2025 jyldyń qazanynda iske qosylady. Jyl sońyna deıin shamamen 3 myń kólik shyǵarý josparda bar. Alǵashqy kezeńde Cerato, Sorento jáne Sportage modelderi óndirilmek. Keıinnen K5, Ceed, Seltos, Soul jáne Picanto úlgileri de konveıerge qoıylady. Barlyǵy 13 túrli model.
Zaýyt iske qosylǵan sátte 1 500-ge jýyq adam jumyspen qamtylady. Búginde kásiporynda 520 maman jumys istep jatyr, al jaqyn arada bul kórsetkish 830-ǵa jetpek. Jańa mamandar úshin arnaıy oqý ortalyǵy qurylyp, teorııalyq jáne tájirıbelik daıarlyq kezeń-kezeńimen júzege asyp jatyr.
Joba iske qosylǵannan keıin Qostanaı oblysynyń óńdeý ónerkásibindegi ósim 46,5 paıyzǵa jetedi dep kútilýde. Osy maqsatta memleket tarapynan da tıisti ınfraqurylym jasaqtalýda: 6,7 mıllıard teńge bıýdjet qarjysy kirme joldar, avtoturaqtar men tasjoldarǵa baǵyttalǵan. Temirjol jelisi paıdalanýǵa berildi, avtojol qurylysy aıaqtalýǵa jaqyn.