Bıyl alǵash ret 23 sáýirde Ulttyq kitap kúni atalyp ótti. Memleket basshysynyń bastamasymen Ulttyq quryltaıda bekitilgen ataýly kún elimizde kitapsúıer qaýymnyń, oqyrmannyń, baspagerlerdiń kópten kútken rýhanı merekesi retinde qabyldandy. Eń aldymen, ulttyq ádebıetti qoldaýǵa baǵyttalǵan bul kún, sóz joq, aldaǵy ýaqytta kitap naryǵyna da úlken serpilis ákeledi dep boljanyp otyr.
Tuńǵysh ret taǵaıyndal-ǵan Kitap kúnimen birge, eldegi ádebı murany saqtaý jáne damytý, túrli býyn ókilderiniń kitapqa degen talǵamyn zerdelep, ádebı qundylyqtar júıesin saralaý maqsatynda «eGov Mobile» qosymshasy arqyly qazaq ádebıetiniń eń úzdik 100 avtoryn anyqtaýdy dittegen jalpyulttyq saýalnama da jarııalanǵan bolatyn.
Osyǵan oraı Almatydaǵy Meloman-Marwin kitap dúkeninde tanymal baspagerler – «Steppeworld» baspasynyń jetekshisi Raısa Qadyr men «Ziyat» baspasynyń basshysy Asylan Tilegen oqyrmandarmen júzdesip, búginge deıin júrgizilgen elektrondyq saýalnamanyń nátıjesin jarııa etti. Raısa Qadyrdyń aıtýynsha, maýsym aıynyń orta shenine deıin saýalnamaǵa 20 000 adam qatysqan. «Bul – óte jaqsy kórsetkish. Kitap oqý mádenıetin qaıta qalyptastyrý, jaqsartý maqsatynda bul ıgi bastamany halyq ózi qoldap ketti. Kitap naryǵyndaǵy ózgeristerdi jiti baqylap kelemin, baıqaǵanym, sońǵy bes jylda ilgerileý bar. Shetel avtorlaryn qazaq tiline aýdarý ǵana emes, óz ulttyq ádebıetimizdiń klassıkterin, jas jazýshylardyń shyǵarmalaryn jaryqqa shyǵarý belsendi túrde qolǵa alyndy. Rýhanııattyń órkendeýine áseri kúshti bul bastalyp jatqan ıgi bastama bolashaqta óz nátıjesin alǵa tartady», dedi Raısa Qadyr.
Baspager «jastar kitap oqymaıdy» degen jattandy pikirmen kelispeıtinin aıtty. Kerisinshe, sońǵy ýaqytta balalaryna arnaıy kitap izdep keletin ata-analar qatary artqan. Ár býyn oqyrmannyń qyzyǵatyn óz avtory bar. Ony osy saýalnama barysynda belsendiligi artyp kele jatqan oqyrman sıpatynyń ózi ańǵartady. «eGov Mobile» qosymshasynda 4 kitapqa deıin daýys berý kórsetilip, saýalnamaǵa qatysýshy tek 4 kitapty tańdaýmen shektelip qalyp jatqanymen, baspagerler endigi jerde ár oqyrman ózi qalaǵan 10 kitabyna deıin daýys bere alatynyn jetkizdi. Ol úshin «Taǵy da kitap qosý» degen batyrmany basyp, ári qaraı súıikti kitaptaryn engizýge bolady. Jobanyń ereksheligi sol, dál osy kezeńde qaı avtordyń shyǵarmasy suranysqa ıe ekenin anyqtap, buryn tanymal bolmaǵan, biraq qalam qýaty myqty avtorlardy tanýǵa múmkindik beredi ári ádebıet álemine endi esik ashqan jas qalamgerlerge jiger syılap, júregine senim uıalatady.
«Jalpyulttyq saýalnama – ár saýatty oqyrman úshin syn. Jastar kitapty jaqsy kóredi. Biraq ne oqý keregin bilmeıdi. Bul joba qandaı kitaptardy oqý kerek degen suraq týǵanda, kádesine jaraıtyn paıdaly tizim bolady dep oılaımyn. Rasynda, ilgeride ádebı aınalymǵa túse almaı qalǵan, biraq keńestik kezeńde oqyrmany kóp bolǵan tanymal shyǵarmalar ádebıetimizde óte kóp. Solarǵa jańa tynys beretin joba bolatynyna senemin. Biraq tizimge ený úshin ony da el tanýy kerek. Saýalnama týraly estimeı, bilmeı jatqan oqyrmanǵa osy tilegimiz jetse eken deımiz», deıdi Asylan Tilegen.
Baspagerler 23 shildege deıin jalǵasatyn qazaq ádebıetiniń úzdik 100 týyndysyn anyqtaýǵa atsalysyp, ádebı talǵam qalyptastyrýda qalys qalmaı, belsendirek bola túsýge shaqyryp otyr. 10 tamyz – Abaı kúni saýalnama máresine jetip, joba aıasynda anyqtalǵan 100 kitaptyń tizimi jaryq kóredi. Júzdesý sońynda bes myńynshy jáne on bir myńynshy bolyp qatysyp, daýys bergen eki oqyrman ortaǵa shaqyrylyp, olarǵa osy jobanyń seriktesi «Meloman-Marwin» kitap dúkeni atynan sertıfıkat tabys etildi.
ALMATY