QOSTANAI. 04 tamyz. Reseıdiń Chelıabi oblysyndaǵy Naǵaıbaq aýdanynda «Mahalla» meshitiniń 20 jyldyǵy atalyp ótti. Bul týraly egemen.kz tilshisi habarlady.
Qostanaımen kórshi Chelıabi oblysynda 36 myńnan asa qandastarymyz turady. Naǵaıbaq aýdanyndaǵy Arslanbaı aýylyn tutas qandastarymyz jaılap otyr. Munda 1995 jyly musylman meshiti salynǵan bolatyn. О́tken jyldan bastap, osy meshit qaıta jóndelgen bolatyn. Imandylyq úıiniń 20 jyldyq merekesi atalyp ótti. Oǵan Qazan qalasynan, Ombydan, Chelıabi oblysynyń aýdandarynan qonaqtar keldi.
Merekede Ýral óńiriniń mýftıi, Chelıabi jáne Qorǵan oblystary musylmandar aımaqtyq dinı basqarmasynyń tóraǵasy Rınat qajy Raıf jáne basqa da din ókilderi, qurmetti qonaqtar ımandylyq úıiniń merkesimen aýyl, aýdan jurtshylyǵyn quttyqtady.
Rınat qajy hazrat Raıf: «Naǵaıbaq aýdanyndaǵy jalǵyz meshittiń jóndelip, qaıta jańǵyrtylǵanyna biz qýanyshtymyz. Bul musylman jurtyna qyzmet ete beredi. Aýdanda taǵy da meshit salynatynyna senim bildiremiz», – dedi. Munan keıin Naǵaıbaq aýdanynyń basshysy Qaıyrbek Seıilov aýdan jurtshylyǵyn, kelgen qonaqtardy merekemen quttyqtady. Sonaý 90-shy jyldardaǵy aýyr kezeńde osy aýdanda meshittiń salynýyna óziniń muryndyq bolǵanyn aıta kelip, aýdan basshysy jurtty osy iske uıytý, onyń qarjysyn tabý, qurylysyn júrgizý ońaıǵa soqpaǵanyn da tilge tıek etti. Sol kezde kómek qolyn sozǵandarǵa rahmetin aıtty.
Meshittiń merekesine Dúnıejúzi qazaqtary qaýymdastyǵy Qostanaı oblystyq fılıalynyń delegasııasy da qatysty. Mereke konsertpen jalǵasty. Meshit merekesine arnalyp as berildi.
Názıra Járimbetova.
Derek, sýret: egemen.kz.