Baspasóz kúni qarsańynda Batys Qazaqstan oblysynyń Qaztalov aýylynda jerlesteri tanymal tilshi, «Egemen Qazaqstan» gazetiniń ardageri Temir Qusaıyndy eske aldy. Alma Orazbaeva atyndaǵy mektep ǵımaratynda ótken kezdesýge Qaztalov aýdanynyń ákimi Aslanbek Sarqulov, aýdandyq máslıhat tóraǵasy Sársenbaı Moldashev, aýdan ákiminiń orynbasary Serik Qaıyrlıev, Temir Qusaıynnyń baýyrlary Mırlan Naǵymuly, Nurlan Naǵymuly, uly Qýanysh, jergilikti zııaly qaýym ókilderi, mekeme basshylary qatysty, dep habarlaıdy Egemen.kz.
Temir Naǵymuly 40 jyl jýrnalıstik qyzmetiniń basym bóliginde «Egemen Qazaqstan» gazetiniń Batys Qazaqstan oblysyndaǵy tilshisi bolyp eńbek etti. Osy kezeńde «Eren eńbegi úshin» medalimen, «Qurmet» ordenimen marapattaldy, «Aqparat salasynyń úzdigi» boldy, Qazaqstan Jýrnalıster Odaǵy syılyǵynyń jáne «Parlament sózi» arnaıy syılyǵynyń laýreaty, Qaztalov aýdanynyń qurmetti azamaty atandy.
Tanymal tilshiniń týǵan jerinde ótken keshte aýdan ákimi Aslanbek Ahmetollauly, eńbek ardageri Ýálıolla Ábishev, baýyry Mırlan Naǵymuly, aýdandyq máslıhat tóraǵasy Sársenbaı Moldashev, aýdandyq «Aýyl aınasy» gazetiniń tilshisi Qydyr Haresuly Temir aǵa jaıly estelikterin ortaǵa saldy. Jýrnalıstiń ómir joly men shyǵarmashylyǵy jaıly áserli áńgimeler aıtyldy. Shara aıasynda jaqynda baspadan shyqqan «Egemenniń Temiri» atty kitaptyń bir bóligi aýdan kitaphanalaryna syıǵa tartyldy.
Qaztalov aýdany – «Egemen Qazaqstan» gazetiniń tarıhynda erekshe orny bar óńir. О́ıtkeni 1919 jyly Orynborda jaryq kórgen «Ushqyn» gazetiniń alǵashqy redaktorlary Halel Esenbaev pen Tamımdar Safıev dál osy óńirdiń týmasy edi. Tarıhı topyraq pen basylym arasynda qarym-qatynas áli de kúshti. Gazettiń Batys Qazaqstan oblysyndaǵy eń kóp oqyrmany da osy aýdanda. Sondyqtan da osy jıynda «Qazaq gazetteri» JShS bas dırektory Dıhan Qamzabekulynyń arnaıy alǵys haty aýdan ákimi Aslanbek Sarqulovqa tabystaldy.
Kesh barysynda jergilikti ónerpazdar Murat Ahmetov, Botakóz Maqatov, Oralhan Erǵalıev oryndaǵan ásem ánder eske alý sharasynyń mazmunyn baıyta tústi.
Batys Qazaqstan oblysy