AQSh Prezıdenti Donald Tramp pen áıgili kásipker Ilon Mask arasyndaǵy rıtorıkalyq qaqtyǵys jańa qarqyn alyp otyr. Buǵan sebep – Senat qaraýyndaǵy shyǵyndar men salyqtarǵa qatysty zań jobasy. Mask bul qujatty «aqylǵa qonbaıtyn» jáne Respýblıkalyq partııa úshin «saıası sýısıd» dep baǵalasa, Tramp oǵan jaýap retinde: «Dúkenińdi jap ta, úıińe – Ońtústik Afrıkaǵa qaıt» dep shúılikti, dep jazady Egemen.kz.
Truth Social áleýmettik jelisinde jarııalaǵan málimdemesinde Tramp:
«Elektromobılder – jaqsy dúnıe. Biraq olardy bárine kúshtep tyqpalaýdyń qajeti joq. Ilon – tarıhtaǵy eń kóp sýbsıdııa alǵan adam. Sol sýbsıdııalar bolmasa, áldeqashan kásibin jaýyp, Ońtústik Afrıkaǵa keter edi», dep jazdy Aq úı basshysy.
Tramp sonymen qatar Ilon Mask basshylyq etken Departamenttiń (DOGE – Memlekettik tıimdilik departamenti) shyǵyndaryn tekserýdi usyndy:
«Zymyrandar men spýtnıkterdi ushyrýǵa da, elektromobılder jasaýǵa da tyıym salsaq, el bıýdjeti mıllıardtaǵan dollar únemder edi. DOGE-ge osy baǵytty muqııat zertteýge keńes beremin», dedi ol.
Daýdyń basy – Tramp maqtanyshpen One Big Beautiful Bill (Bir úlken ádemi shot) dep ataǵan zań jobasy. Qujatta:
4 trıllıon dollardan astam salyqtyq jeńildikterdi uzartý, shaıpulǵa salynatyn salyqtardy alyp tastaý, ımmıgranttardy jappaı deportasııalaý kampanııasyna qarjy bólý, «Altyn kúmbez» atty zymyranǵa qarsy jańa qorǵanys júıesin salý sııaqty bastamalar qamtylǵan.Senat zań jobasyn aldyn ala maquldap, endi túpkilikti daýys berýge kirispek.
Mask: «Biz shoshqalar partııasynda ómir súrip jatyrmyz»
Qoǵamda qyzý pikirtalas týǵyzǵan zań jobasyna qatysty Mask óz pozısııasynan taımaı otyr. X (burynǵy Twitter) jelisinde ol:
«Memlekettik qaryz shegin bes trıllıon dollarǵa kóteretin mundaı joıqyn zań – eldi birpartııalyq júıege aınaldyryp jatyr. Bul – Shoshqalar partııasy! Halyqty shynaıy oılaıtyn jańa partııa kerek», dep jazdy.
Aıta keteıik, Mask buǵan deıin Tramptan keshirim suraǵanymen, «bir úlken, kórkem zańdy» qoldamaıtynyn ashyq málimdedi.
Tramp pen Mask arasyndaǵy tartys tek eki bedeldi tulǵanyń eregesi emes. Bul – AQSh-taǵy bıýdjettik saıasat, memlekettik sýbsıdııalar men tehnologııalyq ındýstrııa bolashaǵyna qatysty iri qoǵamdyq pikirtalastyń bir kórinisi. Kásipker men saıasatker arasyndaǵy mundaı sóz qaqtyǵysy aldaǵy saılaý aldyndaǵy naýqanǵa da áser etýi múmkin.