Memleket basshysy Qasym-Jomart Toqaevtyń energetıka jáne kommýnaldyq sektorlardy jańǵyrtý jónindegi tapsyrmalaryn iske asyrý aıasynda Pavlodar oblysynda ınjenerlik jeliler men jylý kózderiniń tozýyn azaıtý baǵytynda aýqymdy jumystar qolǵa alyndy. Osy maqsatta Úkimet rezervinen Pavlodar jáne Ekibastuz qalalaryndaǵy jylý jelilerin jóndeý jumystaryn aıaqtaý úshin shamamen 3,8 mıllıard teńge bólindi. Qarajat bólý týraly tıisti qaýlyǵa Qazaqstan Respýblıkasynyń Premer-mınıstri Oljas Bektenov qol qoıdy, dep habarlaıdy Egemen.kz.
Bólingen qarajattyń basym bóligi shamamen 3 mıllıard teńge Ekibastuz qalasyndaǵy jylý jelilerin jańǵyrtýǵa baǵyttalǵan. Atap aıtqanda, bul soma Ortalyq jylý taratý pýnktinen 1,4 shaqyrym jerdegi eldi mekenge deıin sozylatyn TM-I jáne TM-III magıstraldaryn jóndeýge jumsalady.
«Pavlov – Shevchenko – Kataev kóshesindegi turǵyn úı shaǵyn aýdanyn jylýmen qamtamasyz etý úshin Kamzın kóshesi boıynsha TM-13 salý jobasyn aıaqtaýǵa Pavlodar qalasyna 802 mln teńge baǵyttalady. Shyǵyndardyń jalpy somasy 5,8 mlrd teńgeni quraıdy. Úkimet rezervinen 3,8 mlrd teńge bólindi. Qalǵan 2 mlrd teńge kólemindegi qarajat oblystyq bıýdjetten qarjylandyryldy. 2024 jyly Úkimet rezervinen bólingen qarajatqa uzyndyǵy 9 shaqyrym magıstraldyq jylýmen jabdyqtaý jelilerine jóndeý júrgizildi. Ekibastuz JEO-da qazandyq agregattary jóndelip, tazartylǵan sý qubyry salyndy», dep habarlady Úkimettiń baspasóz qyzmeti.
Buǵan qosymsha, oblys boıynsha jylý berýshi kásiporyndarda 2,4 shaqyrym jylý jelileri jańartylǵan. Onyń ishinde «Tarıfti ınvestısııaǵa aıyrbastaý» baǵdarlamasy aıasynda salynǵan, quny 1,7 mıllıard teńge bolatyn 2,1 shaqyrymdyq jańa jylý jelileri bar.
Osy jumystardyń nátıjesinde 2024 jyldyń basynda oblystaǵy jylý jelileriniń tozý deńgeıi 79,7%-ǵa deıin tómendegen.
«Oblys ortalyǵy men Ekibastuz qalasyndaǵy jelilerdiń tozýyn odan ári tómendetý jáne aldaǵy jylytý maýsymynda úzdiksiz jylýmen qamtamasyz etý úshin jylý magıstraldarynyń aǵymdaǵy rekonstrýksııasyn ýaqtyly aıaqtaý qajet. 2024 jylǵy jeltoqsanda bekitilgen «Energetıkalyq jáne kommýnaldyq sektorlardy jańǵyrtý» ulttyq jobasyn júzege asyrý sheńberinde Pavlodar qalasynda 1-NO-52 JEO ýchaskesinde ótkizý qabiletin arttyra otyryp, 9,8 mlrd teńge somaǵa jańa TM-20a jylý magıstralin salý josparlanýda. Joba negizinde respýblıkalyq bıýdjetten qarajat qarastyrylmaǵan qala aýmaǵynyń 30%-yn jylýmen qamtamasyz etý kózdelgen», delingen habarlamada.