Bıyl 1 shildede Eýrazııalyq ekonomıkalyq komıssııa Alqasynyń otyrysynda memlekettik satyp alýlar maqsatynda taýarlardyń shyqqan elin anyqtaý qaǵıdalaryna 11-qosymshasyn alty jańa taýar pozısııasymen – medısınalyq jáne hımııalyq buıymdarmen tolyqtyrý týraly sheshim maquldandy. Bul sheshim – Eýrazııalyq ekonomıkalyq odaq (EAEO) taýarlary retinde tanylatyn ónimder tizbesin keńeıtýge jáne tıisinshe, Odaqtyń barlyq múshe memleketteriniń aýmaǵynda memlekettik satyp alýlarǵa qatysý kezinde olarǵa ulttyq rejım berý maqsatynda qabyldandy. Bul taýarlar shyqqan elin rastaıtyn ST-1 sertıfıkaty bolǵan jaǵdaıda EAEO elderiniń memlekettik satyp alýlaryna qatysa alady, dep habarlaıdy Egemen.kz.
Saýda jáne ıntegrasııa mınıstrliginiń baspasóz qyzmetiniń habarlaýynsha, mańyzdysy, buǵan deıin Reseı tarapy memlekettik satyp alýlarǵa qatysý úshin taýarlardyń shyǵarylǵan elin anyqtaý ólshemsharttaryna sáıkes keletin jekelegen ónerkásiptik taýarlarǵa ruqsat beretin qaýly qabyldaǵan bolatyn. Atap aıtqanda, taýarlardy Reseı Federasııasy aýmaǵynda qaıta óńdeýdiń jekelegen operasııalaryn júrgizý, óndiriletin taýarlardyń reseılik tizilimde bolýy jáne t.b.
Osylaısha, ST-1 sertıfıkaty bar Qazaqstan óndirýshileri tenderlerge jergilikti jetkizýshilermen teń jaǵdaıda qatysa alady, bul ónimderdi ótkizýge jáne naryqty keńeıtýge tolyq qoljetimdilik beredi.
Bul sheshim Qazaqstannyń EAEO aıasyndaǵy belsendi ustanymy men jumysynyń nátıjesi bolyp tabylady jáne elimizdiń Odaqtaǵy ekonomıkalyq múddelerin ilgeriletýge baǵyttalǵan.
Búginde shyǵarylǵan eli ST-1 sertıfıkatymen rastalatyn taýarlar tizbesi 309 ataýdy qamtıdy (taýarlardyń tolyq tizbıýesimen Komıssııanyń resmı saıtynda tanysýǵa bolady: eec.eaeunion.org).
Atalǵan sheshimdi túpkilikti bekitý úshin jýyrda Eýrazııalyq ekonomıkalyq qaýymdastyq (EEQ) Keńesiniń qaraýyna usynylatyn bolady.