Demalysqa shyqqan depýtattar keshe de elimizdiń biraz óńirinde bolyp, nazarda turǵan nysandardy aralap kórdi. Atap aıtsaq, Májilis depýtaty Nurtaı Sabılıanov Abaı oblysynyń birqatar aýylynda bolyp, turǵyndardyń máselesin tyńdady.
«Amanat» partııasy fraksııasynyń múshesi Nurtaı Sabılıanov Abaı oblysy Jarma aýdanyna qarasty Qońyrbıik, Kishi Qarasý jáne Salqyntóbe aýyldarynyń turǵyndarymen kezdesti. Qońyrbıik aýylynda aqsaqaldar jaıylym jerlerdiń jetispeýshiligi máselesin kóterdi. Jergilikti turǵyndardyń aıtýynsha, mal bar, alaıda ony jaıatyn jer tar. Sonymen qatar Qonyrbıik aýylynda ınternet jelisine qosylý, medısınalyq pýnkt ashý, jedel járdem kóligin bólý, mektepke sportzal salý jáne aýyzsýǵa qoljetimdilikti arttyrý máseleleri de kóterildi. Kishi Qarasý aýylynyń turǵyndary áıelderdiń zeınet jasynyń tómendetilýin usyndy jáne aýylǵa joǵary jyldamdyqty ınternet tartýdy surady. Salqyntóbe aýylynda basty máseleler retinde joldyń joqtyǵy, eskirgen elektr jelileri jáne abattandyrýǵa arnalǵan bıýdjettiń jetkiliksizdigi ataldy.
Májilis depýtaty, OSDP fraksııasynyń ókili Ajar Saǵandyqova Pavlodar qalasyndaǵy jumyspen qamtý jáne áleýmettik baǵdarlamalar bóliminiń «Daǵdarys ortalyǵy» KMM jumysymen tanysty. Ortalyq qıyn ómirlik jaǵdaıǵa tap bolǵan áıelder men balalarǵa keshendi kómek kórsetedi. Kezdesý barysynda Ajar Saǵandyqova ortalyqtaǵy turmystyq jaǵdaımen tanysyp, qyzmetkerlermen jáne ortalyq turǵyndarymen pikir alysty. Depýtat mamandardyń kásibıligin jáne jumysyna jan-tánimen berilgendigin erekshe atap ótti.
Petropavlda memleketke qaıtarylǵan aktıvter esebinen 280 oryndyq balabaqsha salynyp jatyr. Quny 1,9 mlrd teńge bolatyn joba jyl sońyna deıin paıdalanýǵa berilýge tıis. Qazir qurylys jumystarynyń tek 40 paıyzy oryndalǵan. Osyǵan oraı óńirge arnaıy kelgen Májilis depýtattary, «Amanat» partııasy fraksııasynyń músheleri qurylys qarqynyn arttyrýdy talap etti. Sebebi soltústik óńirde jaz qysqa, al ár kún – esepteýli. Májilis depýtattary Erkebulan Mambetov pen Dmıtrıı Koloda sapar barysynda qarajattyń tıimdi jumsalýyn, nysannyń qazirgi jaǵdaıyn jáne qurylys kestesiniń saqtalýyn baqylaýdy maqsat etti. Balabaqshany osy jyldyń jeltoqsan aıynda paıdalanýǵa berý josparlanyp otyr.
«Qazaqstan Halyq partııasy» depýtattyq fraksııasynyń jetekshisi Magerram Magerramov pen Májilistiń Zańnama jáne sot-quqyqtyq reforma komıtetiniń tóraǵasy Snejana Imasheva óńirlerge jasalǵan depýtattyq sapar aıasynda Astana qalasy ákimdiginiń «Arnaıy áleýmettik qyzmetterge muqtaj balalardy qoldaý ortalyǵy» KMM-ne bardy.
Sapar barysynda depýtattar qıyn ómirlik jaǵdaıǵa tap bolǵan balalarǵa arnalǵan áleýmettik kómek kórsetý, tárbıelik jumys uıymdastyrý jáne turmys jaǵdaılarymen tanysty. Qazirgi tańda bul ortalyqta bes túrli sanattaǵy balalar turyp jatyr.
Ortalyq dırektory Indıra Nurmuhambetovanyń aıtýynsha, mekemeniń basty maqsaty – balalarǵa qaýipsiz turmystyq jaǵdaı jasaýmen qatar, moraldyq jáne psıhologııalyq qoldaý kórsetý. Sapar qorytyndysynda Magerram Magerramov mekeme ujymynyń kásibıligi men jan-tánimen berilip isteıtin eńbegin joǵary baǵalady.