Ulttyq dombyra merekesi men Astana kúni elorda Jeruıyq saıabaǵyndaǵy kúıshi Dına eskertkishiniń qasynda uly jyraýlar men jyrshylar esimi qashalǵan eskertkish saltanatty túrde ashyldy. "Ǵasyrlar úni" atty eskertkishtiń ashylýyna Premer-mınıstrdiń keńesshisi Eraly Toǵjanov, jyrshy, jyraý Almas Almatov bastaǵan rýhanııat ókilderi qatysty, dep jazady Egemen.kz.
"Jeruıyq" saıabaǵyndaǵy Kúıshiler alleıasyna turǵyzylǵan bul mármár tasqa 110 jyraý men jyrshynyń aty-jóni qashalǵan. Buǵan deıin mundaı monýment kúıshi-kompozıtorlerge qoıylypty. Onda halqymyzdyń uly sazgerleriniń esimi jazylǵan.
Jyraýlar men jyrshylar esimi qashalǵan eskertkishtiń ashylý saltanatynda sóz sóılegen Eraly Toǵjanov azattyqtyń qadiri men Astana kúniniń mańyzyna toqtala kele, Dombyra kúninde ashylyp jatqan eskertkish tasty tarıhqa taǵzym retinde baǵalady. "Azattyq alyp, astanaly el bolmaǵanda mundaı ıgilikke jete alar ma edik? Dombyra men qazaqtyń Qazaqstannan basqa janashyry joq jer betinde" degen oıdy arqaý etti Premer-mınıstr keńesshisi.
Saltanatty sharada atalǵan ıgiliktiń ashylýyna muryndyq bolǵan "Kúı anasy" qoǵamdyq qorynyń basshysy Tólegen Qýanyshev, Almaty aýdanynyń ákimi Rústem Táýekelov sóz sóılep, atsalysqan ónerpazdarǵa alǵys hat pen syı-sııapat jasady. Belgili jyrshylar Amandyq Kómekov, Almas Almatov, taǵy basqa kúıshi, ónerpazdar óner kórsetti.