Elimizde sportshylar men jattyqtyrýshylarǵa, tóreshiler men sala ókilderine arnalǵan sporttyq ádep normalary jańa zańnama talaptaryna saı ózektendirildi. Bul týraly Mádenıet jáne aqparat mınıstrligi Týrızm jáne sport komıteti málimdedi, dep jazady Egemen.kz.
2020 jylǵy 28 aqpandaǵy №51 buıryqpen bekitilgen «Qazaqstan Respýblıkasynyń sporttyq ádebi» qujaty endi 2025 jyly kúshine engen «Dene shynyqtyrý jáne sport týraly» Zańnyń jańa redaksııasymen úılestirildi. Jańartylǵan tártip sport salasyndaǵy quqyqtyq retteýlerdi jańa zań talaptaryna beıimdeý maqsatynda júzege asyrylyp otyr.
Qujattyń negizgi maqsaty – burynǵysha, ıaǵnı sporttaǵy minez-qulyq mádenıetin qalyptastyrý. Bul baǵytta sportshylardyń, jattyqtyrýshylardyń, tóreshilerdiń jáne sala mamandarynyń ádeptilik normalaryn anyqtaıtyn qujat quqyqtyq jáne moraldyq qaǵıdattardy basshylyqqa alady.
Atalǵan ózgerister negizinen tehnıkalyq sıpatta jáne qujattyń mazmundyq ózegine áser etpeıdi. Tek termınder naqtylanyp, tujyrymdamalyq til zamanaýı talaptarǵa saı jańartylǵan. Máselen:
burynǵy «ulttyq qurama komanda» ataýynyń ornyna «Qazaqstannyń sport túri boıynsha ulttyq qurama komandasy» degen naqty ári tolyq anyqtama engizildi;
«sport tóreshisi» uǵymy bekitilip, onyń ókilettigi men kásibı talaptary aıqyndaldy;
zamanaýı aqparat quraldary talabyna saı «buqaralyq aqparat quraldary» uǵymy ornyna «mass-medıa» termıni qoldanylatyn boldy.
Aıta ketý kerek, 2020 jylǵy alǵashqy redaksııasynda bekitilgen jáne otandyq sport salasyndaǵy «Ar-namys kodeksi» sanalyp ketken negizgi erejeler sol kúıi saqtalǵan. Olar:
adal oıyn qaǵıdattaryn ustaný; qarsylastarǵa, tóreshilerge, jankúıerler men BAQ ókilderine qurmetpen qaraý; qoǵamdyq tártipke qaıshy, qorlaıtyn áreketterge jol bermeý; sporttyq ortada joǵary moraldyq úlgi kórsetý.Osylaısha, sport salasyndaǵy etıkalyq ustanymdar ýaqyt talabyna saı jańartylyp, zańdyq negizben bekitilgenimen, ózektiligin joımaı, sportshylar men mamandar úshin basshylyqqa alar qundylyqtar jıyntyǵy bolyp qala beredi.