Majarstannyń astanasy – Býdapeshtte kúres túrlerinen «Polyak Imre & Varga Janos» memorıaly márege jetti. Jarysta kóptegen myqty balýan baq synady. Aralarynda Olımpııa oıyndary men álem chempıonattarynda atoı salǵan apaıtóster de boldy.
Dýnaı jaǵalaýyna sapar shekken 18 erkin kúres sheberleriniń basym bóligi tusaýkeser kezdesýlerinde súrindi. Ádil Ospanov (61 kg), Meıirjan Áshirov (70 kg), Nurlan Bekjanov, Dáýlet Ergesh (79 kg), Bekzat Úrkimbaı (97 kg) syndy tanymal sportshylardyń ózi alǵashqy beldesýinde jeńilip qaldy. Qalǵandary da uzaqqa shappady. Tek 61 kg salmaqta beldesken Asyljan Esenkeldiniń jeńis tuǵyryna kóterilýge kúsh-jigeri jetti. Bastapqyda pýertorıkolyq Dılan Shaver, amerıkalyq Set Entonı Grosty utqan qandasymyz jartylaı fınalda japonııalyq Takara Sýdaǵa jol berdi. Qola medal úshin tartysta grýzııalyq Georgıı Gonıashvılıdi aıqyn basymdyqpen jeńdi.
Taǵy úsh jerlesimizdiń júlde alýǵa jaqsy múmkindigi boldy. Alaıda úshinshi oryn úshin básekede Eldos Qýanyshbaı (74 kg) bahreındik Magomedrasýl Aslýevtan, Bolat Saqaev (79 kg) ırandyq Farıborz Babaeıraganıden, Nurjan Isaǵalıev (86 kg) taǵy ırandyq balýan Álı Baqtııar Savadkýhıden utyldy.
Jarystyń úshinshi, tórtinshi kúnderi bozkilemge burymdyldar shyqty. Alǵashqy úsh qarsylasy – reseılik Krıstına Bratchıkova men Ksenııa Býrakova, fransııalyq Paýlıne Lekarpetıerdiń tas-talqanyn shyǵarǵan Jámılá Baqbergenova (72 kg) fınalda úndistandyq Harshıta Harshıtadan utylyp, kúmis medaldy qanaǵat tutty.
Asa aýyr salmaqta Elmıra Syzdyqova qola medaldy qorjynǵa saldy. Alǵashynda lıtvalyq Kamıle Gaýkaıteni utqan ol odan keıin úndistandyq Prııa Prııaǵa ese jiberdi. Qola medal úshin básekede reseılik Valerııa Trıfonovany tize búktirdi.
Týrnırdi grek-rım kúres sheberleri qorytyndylady. Bul jarysta 21 jerlesimiz beldesti. Solardyń ekeýi ǵana el senimin aqtady. 55 kg salmaqtaǵy Marlan Muqashev Denıs Mıhaı (Rýmynııa) men Alpamys Dastanbekti (Qazaqstan) utyp, fınalda álem chempıonatynyń eki dúrkin júldegeri, Álem kýboginiń ıegeri, Eýropanyń eki dúrkin chempıony Emın Sefershaevtan (Reseı) jeńildi. Tusaýkeser kezdesýinde Tokıo Olımpıadasynyń qola júldegeri, álem men Eýropanyń eki dúrkin chempıony Sergeı Emelınge (Reseı) ese jibergen 63 kg salmaq dárejesindegi Erjet Jarylqasyn odan keıin О́zbekstannyń qos óreni – Aıtjan Qalmahanov pen Islamjon Baharamovtan basym túsip, qola medaldy enshiledi. 130 kg salmaqtaǵy Álimhan Syzdyqov ta osyndaı nátıje kórsetti. Ol bolashaq chempıon Marat Kamparovtan (Reseı) utylǵanymen, Heıkı Nábı (Estonııa), Muhammed Bákir (Túrkııa), Elıas Kýosmanen (Grekııa) basym tústi.
Býdapeshttiń bozkileminde 82 kg salmaqta bas júldeni oljalaǵan Ádilet Tıýlıýbaevtyń teńdessiz ónerine tánti boldyq. Reseı týy astynda kúresip júrgen Ombynyń qazaǵy Jýhýeok Son (Ońtústik Koreıa), Jalǵasbaı Berdimuradov (О́zbekstan), Rafael Iýnýsov (Reseı), Zoltan Levaıǵa (Majarstan) san soqtyryp, jeńis tuǵyrynyń eń bıik satysyna kóterildi. Ádilet buǵan deıin Eýropa chempıonatynda qola medal ıelenip, Reseı chempıonatynda tórt ret júldegerler qatarynan kóringen.
Sóıtip, elimizdiń balýandary Dýnaı jaǵalaýynan júldemen oraldy. Bul kórsetkishke kóńilimiz toldy dep aıta almasaq kerek. Sebebi Býdapeshtte elimizdiń beldi balýandarynyń barlyǵy óner kórsetti. Biraq olardyń deni dúbirli dodaǵa daıar bolmaı shyqty. Eń ókinishtisi, Majarstan astanasynda elimizdiń ánurany bir ret te shyrqalmady.