Atyraý oblysynda 26 myńnan asa múgedektigi bar azamat turady. Múmkindigi shektelgen ár sanattaǵy jandardyń 4 500-den astamy – kámeletke tolmaǵan balalar.
Memleket tarapynan taǵdyrdyń teperishine tap bolǵan jandardyń tolyqqandy emdelýine, sapaly bilim alýyna qolaıly jaǵdaı jasalyp otyr. Bıyl Atyraýda múgedektigi bar jasóspirimder ǵana qyzmet kórsetetin ınklıýzıvti kofehana ashyldy. Osynaý ıgilikti isti qolǵa alǵan «Zeıin-Atyraý» erekshe balalardy damytý ortalyǵy janynan jumysyn bastaǵan alǵashqy tamaqtaný ornyna «BelYes» degen ataý berildi.
Atalǵan ortalyq jetekshisi Ánýar Begisbaevtiń aıtýynsha, kofehanadaǵy daıashy qyzmetine múmkindigi shekteýli jasóspirimderdi tartý kózdelgen. Bastapqyda eki jasóspirim jumysqa alyndy. Olar kelýshilerden tapsyrys alyp, daıyndalǵan kofeni, ózge de taǵam túrlerin usynady. Aldaǵy ýaqytta munda jumys isteıtin jasóspirimderdiń qatary kóbeıedi.
«Ortalyqty ashqan Araılym Nuǵymanova erekshe balalardyń qoǵamnan alshaqtamaýyn, kúızeliske túspeýin oılap júrýshi edi. Ol AQSh-taǵy osyndaı ortalyqtardyń jumysymen tanysyp kelgennen keıin múmkindigi shekteýli jasóspirimder jumys isteıtin ınklıýzıvti kofehana ashýdy armandady. Biraq Túrkııadaǵy jol apatynan qaza taýyp, kókeıinde júrgen isin júzege asyra almady. Biz zamandasymyzdyń bastaǵan ıgilikti isin odan ári jalǵastyryp, armanyn iske asyrýdy maqsat tuttyq», dedi Á.Begisbaev.
Onyń aıtýynsha, arnaıy joba aıasynda 10 jasóspirim arnaıy oqytý kýrsynan ótken. Olar tek daıashy qyzmetin atqarýmen shektelmeıdi.
«Kofehanany ashýdaǵy maqsatymyz – tek tabys tabý emes, múmkindigi shektelgen jasóspirimderdiń qatarlastarynan tys qalmaı, kúndelikti tirshilikke beıimdelýine atsalysý, eń bastysy eńbekke baýlý. О́ıtkeni múgedektik sanaty berilgen jasóspirimderdiń arasynda talantty, jumys isteýge qabiletti jandar az emes. Biz jas sanatyna qaramastan múgedek jandardy qoǵamnan alshaqtatatyn bolsaq, mundaı kózqaras olarǵa moraldyq ári psıhologııalyq turǵydan aýyr soqqy bolady. Sondyqtan osyndaı jandarǵa, ásirese jasóspirimderge músirkeý turǵysynan emes, adamdarmen tolyqqandy qarym-qatynas jasaýyna qoldaý kórsetýdi, keńes berýdi kózdedik. Inklıýzıvti kofehanada jumys isteıtin jasóspirimder tájirıbe jınaqtaıdy. О́ziniń áleýetin ashyp, qoǵam isine aralasýyna múmkindik alady», dedi Á.Begisbaev.
Kofehanada erekshe jasóspirimder túrli taǵamdar pisirýge atsalysady. Qazirdiń ózinde dámi til úıiretin táttilerdi ózderi daıyndaýǵa beıimdele bastady. Sondaı-aq tamaqtaný ornynda kofe men taǵam túrleri, ásirese táttiler ǵana usynylmaıdy. «Zeıin-Atyraý» erekshe balalardy damytý ortalyǵynyń qyzmetkerleri kofehanaǵa kelýshilerge múmkindigi shektelgen balalardyń ózderi jasaǵan qolóner buıymdaryn usynýdy qolǵa aldy.
«Qazir burynǵydaı emes, shaı men tátti sýsyndardy ishýdiń ornyna kofeniń dámin tatyp kórýge suranys kóbeıdi. Kofehanany ashar kezde osyny eskerdik. Erekshe qajettiligi bar jasóspirimderge jumys ornyn usynyp qana qoımaı, olardyń qoǵamǵa kirigýine yqpal ettik. Bul – maqsatymyzdyń iske asa bastaǵanynyń kórinisi. Kofehana bir mezgilde 15 adamnyń tamaqtanýyna eseptelgen. Biraq keı kúnderi kelýshiler qatary budan da kóp bolady. Turǵyndar tarapynan múmkindigi shekteýli jasóspirimdermen áńgimelesýshiler, olardyń kórsetken qyzmetine alǵysyn bildirýshiler az emes. Demek kofehanaǵa kelýshiler erekshe jandardyń qyzmetine qoldaý kórsetýdi shyn kóńilimen qalap turady. Mundaı qadam múmkindigi shektelgen jasóspirimderdi jigerlendiredi. Olardyń servıstik qyzmet kórsetýge qulshynysyn, qyzyǵýshylyǵyn oıatady», deıdi ortalyq jetekshisi.
Atyraý oblysy