E-Qazyna elektrondy saýda platformasynda qaıtarylǵan aktıvterdiń biri – Almaty oblysyndaǵy jer telimin satý boıynsha ótken aýksıondyq saýda sátimen aıaqtaldy. Kezinde jekeniń qolyna zańsyz ótip ketken jer teliminiń loty 217 mln teńgege satyldy.
Bul týraly «Qaıtarylǵan aktıvterdi basqarý» kompanııasynyń (QABK) baspasóz qyzmeti habarlady. Aýksıon tolyq ashyqtyq jáne jarııalylyq jaǵdaıynda ótip, barlyq qatysýshylarǵa teń múmkindik berilgen. Saýdanyń elektrondyq formaty úderistiń obektıvtiligin jáne básekelestik ortany qamtamasyz etken.
QABK baspasóz qyzmeti túsindirgendeı, belgilengen tártipke sáıkes, saýda aıaqtalǵannan keıin 10 jumys kúni ishinde jeńimpaz ben satýshy satyp alý-satý shartyn jasasýy tıis.
«Nysan satyp alýshydan barlyq qarajat satýshynyń shotyna tolyq túskennen keıin ǵana tapsyrylady.
Satýdan túsken qarajat Arnaıy memlekettik qorǵa aýdarylyp, ol bilim berý, densaýlyq saqtaý, ınfraqurylymdy damytý jáne áleýmettik osal toptardy qoldaý sııaqty basym áleýmettik jobalardy qarjylandyrýǵa jumsalady», delingen kompanııanyń aqparatynda.
Eske sala ketsek, «Qaıtarylǵan aktıvterdi basqarý kompanııasy» JShS Memleket basshysy usynǵan zań men tártip bastamasy aıasyndaǵy óz mıssııasyn oıdaǵydaı oryndap keledi. Iаǵnı memleketke qaıtarylǵan aktıvterdi tıimdi, ashyq jáne qoǵamdyq paıdaǵa baǵyttap, olardy eldiń damýy men azamattardyń ál-aýqatyn arttyrýǵa jumys isteıtin ekonomıkalyq aınalymǵa tartý isi jalǵasa bermek.