ASTANA. 8 mamyr. Qaraǵandy-Temirtaý baǵytyndaǵy tas jolda Mercedes markaly kólik kópirdiń beton baǵanasyna soǵylyp, júrgizýshisi tirileı órtenip ketti. Bul týraly tengrinews.kz habarlady.
Jol-kólik apaty dál mereke kúni – 7 mamyrda tús kezinde bolǵan. Apatqa kýá bolǵan Anatolıı Vlasov esimdi azamat kóliktiń kenetten joldyń bir jaǵyna qaraı burylyp baryp, baǵanaǵa soǵylǵanyn aıtady. «Men Mercedes-tiń artynda kele jatqanmyn. Soqqydan keıin kólik birden janyp ketti. Toqtap, júrgizýshige kómektespek boldym. Alaıda, jalyn demde búkil salonǵa jaıyldy. Terezelerinen tútin býdaqtap, kólikke jaqyndaý múlde múmkin bolmady. Bir kezde kólik jarylyp ketti», – deıdi apatty óz kózimen kórgen Anatolıı Vlasov.
Jol apatyna kýá bolǵan jigit birden órt sóndirýshiler men polısııa qyzmetkerlerin shaqyrǵan. Qutqarýshylar órtti sóndirgenimen bári kesh edi. Temirtaý qalalyq ishki ister basqarmasy ákimshilik polısııa bóliminiń habarlaýynsha, qaza bolǵan júrgizýshiniń jeke tulǵasy áli anyqtalmaǵan.
Apat bolǵan jerde jumys istegen jol-patrýldik polısııa qyzmetkerleri Mercedes-tiń memlekettik tirkeý nómiri arqyly rólde kim bolǵanyn anyqtaýda. Qazirgi tańda bul derek boıynsha qylmystyq is qozǵalyp, tergeý amaldary júrgizilýde. Jol-patrýldik polısııa qyzmetkerleri taratqan málimetterge súıensek, qylmystyq is aıasynda órt-tehnıkalyq jáne avtotehnıkalyq saraptamalar júrgiziledi. «Osy saraptamalardyń qorytyndysy jol apatyna qatysty barlyq suraqtarǵa jaýap berip, jaǵdaıdyń aq-qarasyn anyqtaıdy», – deıdi polısııa qyzmetkerleri.
Elaman Qońyr.
Derek, sýret: tengrinews.kz.