AQSh pen Qatar araǵaıyndyǵymen júrip jatqan beıbit kelissózderge qaramastan, M23 búligi taǵy da beıbit halyqty qyrǵynǵa ushyratty, dep jazady Egemen.kz.
Human Rights Watch (HRW) quqyq qorǵaý uıymynyń málimetinshe, Kongo Demokratııalyq Respýblıkasynyń shyǵysyndaǵy Rýtshýrý aýdanynda shilde aıynda keminde 140 beıbit turǵyn M23 búlikshileriniń qolynan qaza tapqan. Bul – 2021 jyly qozǵalys qaıta bas kótergeli beri tirkelgen eń aýyr qylmystardyń biri.
Kýágerlerdiń aıtýynsha, Rýanda qoldaıtyn qarýly top áıelder men balalardy da aıaýsyz jazalaǵan. Qurbandardyń kóbi hýtý etnıkalyq tobynyń ókilderi. M23 sarbazdary keıbir aýyldardy qorshap, turǵyndardyń qashyp qutylýyna jol bermeı, adamdardy qarýmen de, pyshaqpen de óltirgen.
Jergilikti turǵyndardyń aıtýynsha, búlikshiler máıitterdi jerleýge tyıym salyp, keıbir denelerdi ózenge tastaǵan. Quqyq qorǵaýshylar muny adamgershilikke qarsy qylmys dep baǵalap otyr.
M23 nemese «Naýryz 23 qozǵalysy» – 2012 jyly Kongo armııasynan bólinip shyqqan etnıkalyq týtsılerden quralǵan búlikshi top. Ataýy 2009 jylǵy beıbit kelisimge silteme jasaıdy, sebebi sol kelisim talaptary oryndalmady degen ýájben olar qaıta qarý kóterdi. Qozǵalys Kongonyń shyǵysynda jıi qarýly qaqtyǵystar týǵyzyp, ondaǵan myń adamdy bosqynǵa aınaldyrdy. Halyqaralyq uıymdar men BUU M23-ti Rýandanyń áskerı jáne qarjylaı qoldaýyna súıenetin top retinde sıpattaıdy.
Resmı Kıgalı (Rýanda bıligi) M23 qozǵalysyna tikeleı qoldaý kórsetedi degen aıyptaýlardy joqqa shyǵaryp keledi. Degenmen BUU men HRW baıandamasynda Rýandanyń qarýly kúshteri búlikshilerge janama qoldaý kórsetkeni jazylǵan.
Atalǵan oqıǵalar aımaqtaǵy beıbit kelisimderdi toqyraýǵa ushyratty. Buǵan deıin Qatarda M23 pen Kongo úkimeti bitimge qol qoıǵan edi. Biraq kelissózder jalǵasyp jatqan tusta, olar sharttardyń oryndalmaǵanyn aıtyp, kelisimnen bas tartqan.