Turǵyndardyń talap-tilegi eskeriledi

Depýtat kommýnaldyq jaǵa­jaı men birqatar týrıstik nysandy aralap, ınfraqurylym máselesine nazar aýdardy. Atap aıtqanda, sanıtarlyq tazalyq, káriz júıesi, kólik baqylaý jáne ınjenerlik ınfraqurylymnyń jaıy qozǵaldy. B.Kerimbek ınfraqurylymdy jetildirý jumysyn ári qaraı jalǵastyra berý kerektigin atap ótti.

– Alakól – tek Jetisý obly­synyń emes, tutas elimizdiń týrıstik brendi. Keıingi jyl­­dary munda kóp jumys atqa­ryldy. Elektr jaryǵy men ın­ternet máselesi sheshildi. Ká­riz júıesi tartylyp jatyr. Biraq áli de júıeli sheshimdi qajet etetin máseleler bar. Biz úshin basty maqsat – tabıǵat baılyǵyn saqtaı otyryp, ha­lyqqa jaıly jaǵdaı jasaý. Bul baǵytta memleket pen kásip­kerlerdiń kúsh biriktirýi asa mańyzdy, – dedi depýtat.

Aıta keteıik, keıingi jyldary Alakól jaǵalaýynda ınfra­qurylym edáýir jaqsardy. Týrıstik nysandar sany bir jylda 270-ten asty. Uzyndyǵy 56,7 shaqyrym elektr jelisi men qosalqy stansa salynyp, úz­diksiz jaryq berilip otyr. Ja­ǵalaý ınternetpen qamtylyp, 16 bazalyq stansa ornatyldy.

Al Májilistegi JSDP fra­k­sııa­synyń múshesi Ashat Raqym­janov Shyǵys Qazaqstan oblysyndaǵy Beloýsovka aýy­ly­nyń turǵyndarymen kezde­­sip, olardyń ınfraqurylymǵa qatysty kótergen máselelerin tyńdady.

Aýylda ınfraqurylym, sý tapshylyǵy, medısınalyq qyzmetterdiń qoljetimsizdigi men dári-dármek máseleleri ótkir tur. Ásirese turǵyndar qys kezinde qardy eritip paı­dalanýǵa májbúr. Bul jaıt­qa qatysty aýyl ákimi Anatolıı Tash­nıchenko 1 qarashaǵa deıin sý qysymyn qalpyna kelti­retinderi jóninde ýáde berdi.

Qarttarǵa arnalǵan kún­diz­gi stasıonardyń joqtyǵy, aýrýhanada qajetti tósektik oryn­dardyń jetispeýshiligi de aýyl turǵyndarynyń alań­daý­shylyǵyn týǵyzyp otyr. Jańa medısınalyq ǵımarattyń qurylysy tek 2027 jyly bas­talady. Buǵan qosa kezdesýde dári-dármek tapshylyǵy máse­lesi de egjeı-tegjeı kóterildi.

Ashat Raqymjanov bul máse­lelerdi sheshý úshin ýaqyt­sha stasıonardy uıymdastyrýdy, aýrýhanalarda medısına­lyq qyzmetterdiń qoljetimdi­ligin arttyrýdy jáne dári-dár­mek satyp alý tártibin qaıta qaras­tyrýdy usyndy.

Kezdesý sońynda Májilis depýtaty turǵyndardyń mańyz­dy talap-tilegin oryndaýda jergilikti bıliktiń jedel áreket etýi qajet ekenin basa aıtty.

– Turǵyndar aýyzsýmen, dári-dármektermen qamtamasyz etýdi jáne tirshilikke qajetti ınfraqurylymdy durys talap etip otyr. Ákimdik halyqtyń naqty suranystaryna jaýap berýge tıis, – dedi A.Raqymjanov.

Sonymen qatar depýtat Beloýsovka turǵyndarynyń suraqtary men usynystaryn tıisti memlekettik organdarǵa joldaıtynyn, al olardyń oryndalý barysy depýtattyń qadaǵalaýda bolatynyn aıtty.

Almatyǵa jumys sapary barysynda Májilis depýtaty, «Respublica» fraksııasynyń múshesi Aıtýar Qoshmambetov turǵyn úılerdiń mańaıynda ornalasqan shaǵyn dúkenderdiń ıelerimen kezdesip, kásipker­lik saladaǵy ózekti máselelerdi talqylady.

Almatyda mundaı shaǵyn saýda oryndarynyń sany 3,5 myńnan asady. Kásip ıeleri júktemeniń artyp, erejeler­diń únemi ózgerip jatqanyna alańdaýly. Kásipkerler eki negizgi problemaǵa toqtaldy. Birinshisi – 4 paıyz kólemindegi bólshek salyq. Shaǵyn dúken ıeleri rentabeldilikti saqtap qalý úshin ony 2 paıyzǵa deıin tómendetýdi talap etip keledi. Sondaı-aq olardy sıfrlandyrý jáne mobıldi aýdarymdar máselesi tolǵandyrady. Aýdarymdardy baqylaýǵa ba­ǵyt­­talǵan jańa erejeler de alańdatarlyq. Iаǵnı bul ereje banktik komıssııa mól­sheri 5 paıyzǵa deıin jetip, kásip­ker­lerdiń tabysyn azaıtady. Aıtýar Qoshmambetovtiń aıtýyn­sha, dál osyndaı máseleler barynsha talqylanýy kerek. Ol shaǵyn bıznes túsinikti ári ádil erejelermen jumys isteýi kerekti­gin, al qazirgi jaǵdaıda olar tek qysymǵa shydap, kún kórip otyr­ǵanyn aıtty.