Jaqsylyq Úshkempirov atyndaǵy jekpe-jek saraıynda bochchadan «Astana 2025 World Boccia Challenger» halyqaralyq jarysy aıaqtaldy. Júldegerlerdi saltanatty marapattaý rásimine Parlament Senatynyń tóraǵasy, Qazaqstan bochcha federasııasynyń prezıdenti Máýlen Áshimbaev qatysty.
Senat tóraǵasy halyqaralyq jarystyń joǵary deńgeıde ótkenin aıta kelip, bul sportshylardyń sheberliginiń jáne jeńiske degen erik-jigeriniń nátıjesi ekenin atap ótti.
«Prezıdent Qasym-Jomart Toqaev múmkindigi shekteýli azamattardy qoldaý jáne ınklıýzıvti orta qurý máselesine árdaıym basa mán berip keledi. Elimizde «Astana World Boccia Challenger» sııaqty iri saıystyń alǵash ret ótkizilýi osy baǵytta atqarylyp jatqan jumystyń naqty nátıjesi ekeni anyq. Bul jarys bizdiń paraatletter úshin belgili bir deńgeıde synaq boldy. Soǵan qaramastan ulttyq quramamyz laıyqty deńgeıde óner kórsetip, el namysyn abyroımen qorǵap shyqty. Osy oraıda Itıana Shyńǵyshanova, Baljan Bólekpaeva, Elmıra Mýsralıeva, Erhat Almat jáne Azamat Aıazbaev sııaqty sportshylardyń esimderin erekshe atap ótken jón. Halyqaralyq jarystyń jeńimpazdary men júldegerlerin shyn júrekten quttyqtaımyn. Bizdiń sportshylar aldaǵy Paralımpıada, Paraazıada oıyndarynda, basqa da iri dodalarda da top jarady dep senemin. Osy maqsatqa jetý úshin bárimiz birlesip, nátıjeli jumys isteı beremiz», dep M.Áshimbaev júldegerlerdi marapattady.
Sondaı-aq Federasııa prezıdenti «Astana 2025 World Boccia Challenger» týrnırin joǵary deńgeıde ótkizýge atsalysqan barsha belsendi azamatqa, parasportshylarǵa, olardyń ata-analaryna, jattyqtyrýshylar men tóreshilerge jáne eriktilerge alǵys bildirdi.
Jarys qorytyndysy boıynsha Qazaqstan quramasy jekeleı synda eki altyn, eki kúmis jáne bir qola medalmen jalpy esepte úzdik úshtikti túıindedi. Atap aıtqanda, BC2 sanatynda Itıana Shyńǵyshanova jeńiske jetse, VS1 sanatynda Baljan Bólekpaevaǵa teń keler qarsylas bolmady. Al Azamat Aıazbaev (VS4 sanaty) pen Erhat Almat (VS1 sanaty) qorjynǵa kúmis júlde salsa, Elmıra Mýsralıeva (VS4 sanaty) qola medaldy enshiledi.
Komandalyq saıysta Koreıa jáne Iran elinen kelgen parasportshylar tıisinshe birinshi jáne ekinshi oryndarǵa taban tiredi.
Juptyq básekede VS4 sanatynda otandastarymyz Azamat Aıazbaev pen Elmıra Mýsralıeva (Almaty qalasy) top jarsa, Iran eliniń ókilderi ekinshi orynnan kórindi. VS3 sanatynda Koreıa sportshylary úzdik shyqty. Ekinshi jáne úshinshi oryndar tıisinshe Italııa jáne Úndistan sportshylaryna buıyrdy.
Halyqaralyq bochcha federasııasynyń (BISFed) qoldaýymen uıymdastyrylǵan atalǵan saıys elimizde alǵash ret ótkizilip otyr. Týrnır barysynda parasportshylarǵa 2028 jyly Los-Andjeleste ótetin Paralımpıada oıyndaryna qatysý úshin beriletin reıtıngtik upaılar sarapqa salyndy.