Jańa Konstıtýsııa jobasyna engizilgen ózgerister qoǵamda keń talqylanyp jatyr. Ásirese memlekettiń zaıyrly sıpatyn aıqyndaı túsetin normalar kóptiń nazaryn aýdardy. Osyǵan baılanysty Premer-mınıstrdiń orynbasary – mádenıet jáne aqparat mınıstri Aıda Balaeva Facebook áleýmettik jelisinde arnaıy jazba jarııalap, jańa Konstıtýsııalyq túzetýlerdiń máni men mańyzyna toqtaldy, dep jazady Egemen.kz.
«Jańa Konstıtýsııa jobasynda memleketimizdiń zaıyrly sıpatyn burynǵydan da aıqyndaı túsetin norma engizildi. Qoldanystaǵy Konstıtýsııanyń birinshi babynda Qazaqstan ózin demokratııalyq, zaıyrly, quqyqtyq jáne áleýmettik memleket retinde ornyqtyratyny kórsetilgen bolsa, endi bul qaǵıdat derbes ári aýqymdy túrde naqty bekitilip otyr», dep jazdy mınıstr.
Ata zań evolıýsııasy: О́tpeli kezeńnen kemel keleshekke
Onyń aıtýynsha, bul ózgeris eń aldymen azamattardyń dinı senimine, dástúri men jeke tańdaýyna qurmetti kúsheıtýge baǵyttalǵan.
«Ásirese, aılardyń sultany – Ramazan aıynda, kóptegen adam ar-ojdan, adamgershilik, ishki tártip pen ózara qurmet máselelerine aıryqsha mán beredi. Sondyqtan mundaı normalar týraly jan-jaqty salmaqtap, baıyppen paıymdaý mańyzdy», deıdi Aıda Balaeva.
Mınıstr jańa jobadaǵy 7-baptyń 1-tarmaǵynda «Din memleketten bólek» degen qaǵıdanyń naqty jazylýyn mańyzdy ınstıtýsıonaldyq qadam retinde baǵalady.
«Zaıyrly memleket – dindi joqqa shyǵarady degen sóz emes. Bul – jaýapkershilik aıasyn aıqyndaý. Memlekettik saıasat dinı normalarǵa emes, zańǵa negizdeledi. Eshbir din memlekettik nemese mindetti dep eseptelmeıdi. Azamattardyń barlyǵy óz dini men senimine qaramastan teń quqyly», dep atap ótti A. Balaeva.
Mınıstrdiń sózinshe, aldaǵy ýaqytta dinı birlestikterdiń qyzmeti, quqyǵy men jaýapkershiligin retteıtin jeke zań qabyldanatyny aıtylǵan. Konstıtýsııa qundylyqtyq negizdi belgilese, salalyq zańdar sol normalardy júzege asyrý tártibin naqtylaıdy.
Ata zańda adam quqyǵyna qandaı artyqshylyq berildi?
Sondaı-aq jańa bapta dinı uıymdardyń qyzmeti zań aıasynda júzege asatyny, al konstıtýsııalyq qurylys, adam quqyqtary men bostandyqtaryn, ulttyq qaýipsizdik pen qoǵamdyq tártipti qorǵaý maqsatynda belgili bir shekteýler qoıylýy múmkin ekeni kórsetilgen. Bul – ar-ojdan jáne dinı senim bostandyǵy men qoǵam aldyndaǵy ortaq jaýapkershilik arasyndaǵy tepe-teńdikti saqtaý degen sóz.
Aıda Balaeva bul ózgerister jobadaǵy 25-bappen tikeleı úndes ekenin de atap ótti. Onda ár adamnyń ar-ojdan bostandyǵyna quqyǵy bar ekeni bekitile otyryp, osy quqyqty paıdalaný jalpyadamzattyq qundylyqtar men memleket aldyndaǵy mindetterge nuqsan keltirmeýi tıis ekeni naqty jazylǵan.
Dıhan Qamzabekuly: Qazaqstannyń bilim berý saıasatyndaǵy zaıyrly qaǵıdattardy bekitý qajet
Osylaısha, jańa Konstıtýsııa jobasyndaǵy túzetýler qoldanystaǵy normalardy kúsheıte otyryp, konfessııaaralyq kelisimdi, quqyqtyq tártip pen qoǵamdyq turaqtylyqty nyǵaıtýǵa baǵyttalǵan. Eń bastysy – ár adamnyń senimine qurmet saqtaı otyryp, zań aldyndaǵy ortaq jaýapkershilikti bekemdeý.