Mádenıet jáne aqparat mınıstri Aıda Balaeva Almatydaǵy Ábilhan Qasteev atyndaǵy Memlekettik óner mýzeıininiń nelikten ýaqytsha jabylǵanyn túsindirdi, dep habarlaıdy Egemen.kz.
Mınıstrdiń aıtýynsha, mýzeıdi jańǵyrtý sheńberinde shatyrdy aýystyrý, zamanaýı klımattyq júıelerdi ornatý, parket jabyndysyn qalpyna keltirý jáne ózge de tehnıkalyq jetildirýler josparlanǵan.
«Bul sharalar kelýshiler úshin barynsha qolaıly jaǵdaı jasap qana qoımaı, óner týyndylaryn saqtaýdyń zamanaýı talaptaryn qamtamasyz etedi», dedi Aıda Balaeva.
Osyǵan baılanysty 5 tamyzdan bastap mýzeı ýaqytsha jabyldy. Mundaı sheshim eń aldymen el qazynasyna aınalǵan qundy jádigerlerdiń qaýipsizdigin qamtamasyz etý úshin qabyldanǵan.
Jobany júzege asyrýǵa qoldaý kórsetken Senim Qogamy qory men bas demeýshi «Samuryq-Qazyna» AQ-na alǵys bildirildi. Jóndeý jumystaryn merdiger uıym – «Lucky Build Company» JShS atqaryp jatyr.
Mınıstrdiń aıtýynsha, barlyq jumystar aıaqtalǵan soń mýzeı qonaqtaryn jańa zamanǵa saı, shabyt syılaıtyn, óz mártebesine laıyq keńistikte qarsy alady.