Jalpy otyrystyń kún tártibi naqtylandy

Depýtattarǵa bıylǵy 15 sáýirde Erevan qalasynda jasal­ǵan Qazaqstan men Armenııa úkimetteri arasyndaǵy kóshi-qon salasyndaǵy yntymaqtas­tyq týraly kelisim men eki el azamattarynyń saparlary men bolý tártibi týraly kelisimdi ratıfıkasııalaıtyn zań jobalaryn qaraý usynylady.

Kóshi-qon salasyndaǵy yntymaqtastyq týraly kelisim statıstıkalyq, quqyqtyq jáne ǵylymı-ádistemelik aqparatpen, taraptardyń aýmaqtarynda ornalasqan memleketterdiń azamattary týraly málimettermen almasýdy, sondaı-aq kóshi-qon saıasaty máseleleri boıynsha tájirıbe men praktıkalyq kómek kórsetýdi kózdeıdi. Azamattardyń turǵylyqty jeriniń quqyqtyq jaǵdaıy, kóshi-qon zańnamasyn buzý faktilerin anyqtaý jáne zań­syz kóshi-qon arnalarynyń jolyn kesý máselelerine erekshe nazar aýdarylady. Bul sharalar ózara is-árekettiń tıimdiligin arttyrýǵa jáne qos azamattyqpen kúresýge baǵyttalǵan.

Al ekinshi kelisim azamat­tardyń júrý jáne bolý tártibine qatysty. Ol eki el azamattaryna kelisimde kózdelgen jaramdy qujattardyń biri boıynsha memlekettik shekarany kesip ótken kezden bas­tap 90 táýlikke deıin ekinshi tarap memleketiniń aýmaǵyna erkin kirý, shyǵý, tranzıtpen ótý, oryn aýystyrý jáne bolý quqyǵyn beredi.

Sondaı-aq jalpy otyrysta depýtattar jańa zań jobalaryn jumysqa qabyl­daıdy. Olardyń qataryn­da «Qazaqstan Respýb­lıkasyndaǵy saılaý týraly» Konstıtýsııalyq zańǵa en­giziletin túzetýler, «2026–2028 jyldarǵa arnalǵan respýb­lıka­lyq bıýdjet týraly» jáne osy jyldarǵa arnalǵan respýb­lıkalyq jáne oblystyq bıýdjetter, res­pýblıkalyq mańyzy bar qalalar, astana bıýdjetteri ara­syndaǵy jalpy sıpattaǵy transfertterdiń kólemi týraly» zań jobalary, Sıfrlyq kodeks jobasy men oǵan ilespe túzetýler, memlekettik basqarý men ózin ózi basqarýǵa qatysty zańna­malyq ózgerister, sondaı-aq basqa da jobalar bar.