ASTANA. 8 mamyr. Aqtaýda polısııa qyzmetkerleri toı kólikteriniń júrgizýshilerine aıyppul saldy «Gelendvagen» jáne Toyota Land Cruiser markaly alty kólikten quralǵan toı kortejiniń zańsyzdyǵy 2 mamyr kúni beınebaqylaý kamerasyna túsip qalǵan. Bul týraly lada.kz habarlady.
Úsh jolaqty jolda toı kólikteri ózge júrgizýshilerdiń jolyn jaýyp tastap, munysymen qoımaı, birneshe ret joldyń qarsy baǵytyna shyǵyp ketken. Esirgen júrgizýshilerdiń kósheniń tyıym salynǵan tusynan burylǵany da beınetaspada anyq kórinedi.
Mańǵystaý oblystyq ishki ister departamentiniń baspasóz jetekshisi Álııa Shermaǵambetovanyń málimdeýinshe, kortejdi polısııa qyzmetkerleri toqtatqan. Birneshe zańsyzdyqqa jol bergen eki júrgizýshi júrgizýshilik kýáliginen aıyrylýy ábden múmkin.
«Kóbine júrgizýshiler polısııa qyzmetkerlerin toıdyń berekesin ketirdi dep aıyptap jatady. Al shyndap kelgende, merekeniń mánin ketiretinder jol erejesine baǵynbaıtyn júrgizýshilerdiń ózderi. Sebebi, polısııa qyzmetkerlerine rólde kim otyrǵany mańyzdy emes. Júrgizýshilerdiń áleýmettik dárejesi, onyń qarjylyq jaǵdaıy men baılanystary da eshteńeni ózgertpeıdi. Zań aldynda bári birdeı!», – deıdi Álııa Shermaǵambetova.
Mańǵystaý oblystyq shki ister departamenti taratqan málimetterge qaraǵanda, beınebaqylaý kameralary jáne beıne tirkegishterdiń kómegimen polısııa qyzmetkerleri joldaǵy zańsyzdyqtardy jıi tirkep, olarǵa tez shara qoldana alady.
Elaman Qońyr.
Derek, sýret: lada.kz.