Qasym-Jomart Toqaev salyq júıesin jetildirýdiń mańyzdylyǵyn atap ótip, sıfrlandyrý arqyly memleket pen bıznestiń qarym-qatynasyn jańa deńgeıge kóterýdi tapsyrdy, dep jazady Egemen.kz.
Prezıdent memlekettik qyzmetterdi sıfrlandyrýda aıtarlyqtaı jetistikterge qol jetkizilgenin, biraq bıýrokratııalyq rásimderdiń áli de bızneske kedergi bolyp otyrǵanyn aıtty.
Memleket basshysy eń aldymen salyqtyq ákimshilendirýdi túbegeıli jetildirý qajettigin atap ótti. Onyń aıtýynsha, Memlekettik kirister komıteti sıfrlandyrý úderisinde kóshbasshyǵa aınalyp, jasandy ıntellekt pen jańa tehnologııalardy salyq tóleýshilerdiń múddesine saı tıimdi qoldanýy tıis.
Sonymen qatar jańa Salyq kodeksi tek normalardy ózgertýmen shektelmeı, ashyqtyq pen adaldyqqa negizdelgen jańa salyq mádenıetin qalyptastyrýy qajet.
«Memleket adal jumys isteıtin salyq tóleýshilerdiń múddesin qorǵaıdy. Olardyń adal eńbeginen túsken salyqty elimizdi damytýǵa jumsaıdy. Salyqtan túsken ár teńge halyqtyń ıgiligine jumsalýǵa tıis», dedi Prezıdent.
Qasym-Jomart Toqaev damý ınstıtýttarynyń da rólin kúsheıtýdi tapsyrdy. Onyń aıtýynsha, bul qurylymdar naqty salalarǵa baǵyttalǵan, tereń taldaý júrgizip, ınvestısııa salýǵa quqyly tolyqqandy damý ınstıtýttary retinde jumys isteýi qajet.