Aqmola oblysynyń ákimi Marat Ahmetjanovtyń tikeleı uıytqy bolýymen qaıtarylǵan aktıvter esebinen Zerendi aýylynda sáýletti sport ǵımaraty boı kóterdi. Jalpy quny 2 mlrd 132 mln teńge turatyn ǵımarat osyndaǵy Balalar men jasóspirimderdiń mamandandyrylǵan sport mektebiniń ıeligine berildi. Sport mektebi 1 mlrd 633 mln teńgeniń qural-jabdyǵymen, turmystyq zattarmen qamtamasyz etilipti.
Manat Mýsın basqaratyn «ÝKStroı» kompanııasy qurylys jumysyn óte sapaly atqarypty. Osy mekeme ápergen sporttyq qural-jabdyqtar da kózdiń jaýyn alady. Respýblıkanyń iri qalalaryndaǵy sport ǵımarattaryn kórip júrmiz. Zerendi sport kesheni sán-saltanaty men qural-jabdyǵy jaǵynan elorda jáne Almaty ǵımarattarynan kem soqpaıdy.
Bul keshenniń ýaqtynda ári oıdaǵydaı salynýyn oblys ákimi Marat Muratuly qatań nazarda ustaǵan eken. Mamandandyrylǵan mektepte sporttyń 7 túrinen jattyǵý ótedi: qazaq kúresi, erkin kúres, boks, shańǵy, sambo,fýtbol, sporttyq týrızm. Aldaǵy ýaqytta grek-rım kúresi, aýyr atletıka, bıatlon bólimderi ashylady. Ázirge ujymdaǵy 24 bapkerdiń qol astynda 807 sportshy sheberlikterin shyńdap júr.
Kúres zalyna kirdik. Aýmaǵy – 24 h 12 metr. Tóbesiniń bıiktigi alty metr eńseli zaldyń tórinde eki kúres kilemi jarqyrap jatyr. Tynysy keń zalda bir mezgilde 29 balýan jattyǵa alady.
Boks zalynyń aýmaǵy – 18 h 12 metr. Sý jańa rıng qurýly tur. Jattyǵýǵa qajetti qural-jabdyqpen tolyq qamtamasyz etilipti. Munda bir mezgilde 25 sportshynyń jattyǵýǵa múmkindigi bar.
Budan basqa aýmaǵy atshaptyrym 2 trenajer zaly bar. Biriniń kólemi 70,40 sharshy metr, ekinshisi 86,00 sharshy metr. Ekeýinde bir ýaqytta 24 adam emin-erkin jattyǵa alady.
Tumsa tabıǵat aıasyndaǵy, jan-jaǵyn jasyl jelek qorshaǵan mektepte oqý-jattyǵý jıynyn ótkizý úshin 48 oryndyq jataqhana bar eken. Mamandar men sportshylardyń as-sý máselesi de oılastyrylǵan.
Osyndaı sáýletti ǵımarattyń aýyl ortalyǵynda salynǵany tamasha bolǵan. Kóptegen aýyldardyń halqy qalalarǵa kóship, qazaqtyń qarashańyraqtary qulazyp, bos qalyp jatqanda oblys ákimdiginiń myna qadamy kóńilge qýanysh syılady. Sebebi aýyl – qazaqtyń berekesi, qutty oshaǵy. El bolýymyzdyń negizgi uıytqysy da qarasha aýyldar. Týǵan tilimizdiń tamyry da aýylda. Salt-dástúrimizdiń ordasy da aýyl. Sondyqtan qazaǵy basym Zerendidegi ǵajap sport kesheni sondaǵy qarasha halyqtyń kózqýanyshy, nesibesi ári arman qýǵan qaradomalaqtardy shyńdaıtyn mádenı ustahana. Mundaı ǵımaratta jattyqqan balalar erteń Tokıo men Dýbaıdyń sport keshenderine erkin kiretin bolady. Mundaı ǵımaratta eńbek etken qazaq mamany jer sharynyń kez kelgen túkpirinde alshań basyp júredi.
Qoshtasarda Zerendi sport mektebiniń basshysy Qaıyrbek Ámirjanulyna «Mekemeńiz chempıondar ustahanasyna aınalsyn!» dep tilek aıttyq.
Qydyrbek Rysbek,
jýrnalıst