Senat spıkeri Máýlen Áshimbaevtyń tóraǵalyǵymen bıýro ótti. Onda depýtattar Memleket basshysy bıylǵy Joldaýynda júktegen mindetterge sáıkes Senattyń jumys josparyn talqylady jáne Palatanyń aldaǵy otyrysynyń kún tártibin bekitti.
Otyrysty ashqan Máýlen Áshimbaev Prezıdent Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Qazaqstan halqyna Joldaýynda bergen tapsyrmalaryn negizge ala otyryp, Senat qyzmetiniń basym baǵyttaryna nazar aýdardy. Soǵan sáıkes palata depýtattary Qazaqstannyń áleýmettik-ekonomıkalyq damýyna jáne basqa da strategııalyq baǵyttarǵa qatysty mańyzdy reformalardy iske asyrýǵa basa mán berýge tıis.
«Búgin Prezıdent Qasym-Jomart Toqaev Parlament palatalarynyń birlesken otyrysynda Qazaqstan halqyna Joldaýyn jarııalady. Sol arqyly Memleket basshysy elimizdiń áleýmettik-ekonomıkalyq damýyna qatysty mańyzdy mindetterdi belgilep berdi. Bul rette ekonomıkany ártaraptandyrý jáne halyqtyń ál-aýqatyn arttyrý máseleleri aıryqsha mánge ıe. Sondaı-aq olardy iske asyrý jolyndaǵy naqty sharalar aıqyndaldy. Memleket basshysynyń barlyq bastamasyn zańnamalyq turǵydan qamtamasyz etý – basty mindetimiz. Sondyqtan tıisti zańdardy ýaqtyly ázirlep, qabyldaýymyz kerek. Joldaýda kóterilgen máseleler men tapsyrmalardy eskere otyryp, IV sessııaǵa arnalǵan Senattyń negizgi is-sharalar josparyn da pysyqtap alýymyz qajet», dedi Senat tóraǵasy.
Sonymen qatar palata spıkeri strategııalyq baǵyttar boıynsha iske asyrylatyn sharalar toptamasyna keńirek toqtaldy. Atap aıtqanda, Memleket basshysynyń sıfrlandyrý jónindegi tapsyrmalary, sonyń ishinde jasandy ıntellekt, platformalyq ekonomıka, úlken derekqorlardy paıdalaný sııaqty máseleler sóz boldy. Odan bólek, «Bankter týraly» zańdy, Sıfrlyq jáne Qurylys kodeksterin ýaqtyly qabyldaý qajet ekeni aıtyldy. Sondaı-aq M.Áshimbaev áriptesterin «Alatau City» qalasynyń arnaıy mártebesi týraly zańdy ázirleý, «Memlekettik múlik týraly» zańdy jańartý, parlamenttik reformany iske asyrý jáne basqa da mańyzdy baǵyttar boıynsha belsendilik tanytýǵa shaqyrdy.
«Prezıdent Qasym-Jomart Toqaev Qazaqstandy úsh jyl ishinde jappaı sıfrly memleketke aınaldyrý jóninde strategııalyq maqsatty belgilep berdi. Osy baǵytta Parlamenttiń aldynda tıisti zańnamalyq baza qurý mindeti tur. Sonyń aıasynda biz Sıfrlyq kodekstiń sapaly qaralýyn jáne ýaqtyly qabyldanýyn qamtamasyz etýimiz qajet. Odan bólek, jyl aıaǵyna deıin Qurylys kodeksi men «Bankter týraly» zań qabyldaýymyz kerek. Sondaı-aq «Alatau City»-di damytýǵa arnalǵan arnaıy zań qabyldaý tapsyryldy. Joldaýda Memleket basshysy ınvestısııalar tartý júıesin qaıta qaraý, memlekettik sektordy reformalaý jáne parlamenttik reforma júrgizý qajet ekenin de atap ótti. Qorshaǵan ortany qorǵaý jáne sýdy únemdeý máselelerine de erekshe nazar aýdaryldy. Aldaǵy ýaqytta tıisti zańnamalardy qabyldaý úshin osy baǵyttarda nátıjeli jumys isteımiz dep senemin», dedi M.Áshimbaev.
Sonymen qatar depýtattar jaz kezinde óńirlerge jasaǵan saparlaryn qorytyndylap, máslıhattardaǵy áriptesterimen jáne azamattarmen kezdesýlerdiń nátıjesinde anyqtalǵan ózekti máselelerdi talqylady. Senatorlar atap ótkendeı, turǵyndardy alańdatqan túıtkilder Úkimet pen jergilikti atqarýshy organdar aldynda kóteriledi. Sondaı-aq olar zańdardy qaraý barysynda nazarǵa alynady.
Bıýroda Senattyń is-sharalar josparyn iske asyrý úshin aldaǵy ýaqytta atqarylatyn jumystar da sóz boldy. Bul rette M.Áshimbaev Álemdik jáne dástúrli dinder kóshbasshylarynyń VIII sezine daıyndyq barysyna erekshe toqtaldy. Aýqymdy halyqaralyq forým Memleket basshysynyń qatysýymen 17–18 qyrkúıekte Astanada ótedi. Sezd aıasynda alǵash ret Birikken Ulttar Uıymynyń О́rkenıetter Alıansymen birlesip arnaıy sessııa uıymdastyrylmaq.
Odan bólek, Bıýro músheleri Senat otyrysynyń kún tártibin bekitti. Soǵan sáıkes aldaǵy beısenbide palata depýtattary «Qazaqstan Respýblıkasynyń keıbir zańnamalyq aktilerine ınnovasııalyq qyzmet salasyn memlekettik qoldaý júıesin jetildirý jáne memlekettik statıstıka máseleleri boıynsha ózgerister men tolyqtyrýlar engizý týraly» zańdy qaraıdy.
Atalǵan zań ınnovasııalyq qyzmetti memlekettik qoldaý júıesin odan ári jetildirý, jańa tehnologııalar engizý jáne el ekonomıkasynyń básekege qabilettiligin arttyrý úshin qolaıly jaǵdaılar jasaýdy kózdeıdi.
Sondaı-aq bıýro músheleri buǵan deıin Parlament Májilisi qabyldaǵan zańdardy jumys úshin Senattyń komıtetterine bólip berdi.