QOSTANAI. 23 maýsym. Eki kún demalysta Qostanaı óńirindegi ózen-kólderge úsh adam batyp ketti. Bul týraly egemen.kz tilshisi habarlady.
Qostanaıda kúnniń ystyǵynan adamdar ózen-kólderge shomylýǵa aǵylyp jatyr. Biraq olar jaǵajaılardan basqa shomylýǵa ruqsat etilmegen jerlerge de barady. Eki kúnde úsh adamnyń sýǵa ketýi sonyń saldary jáne sýǵa masań qalpynda túsetinder de onyń qurbanyna aınaldy.
Sondaı baqytsyz oqıǵanyń biri Qarabalyq aýdanyndaǵy kishi Qarabas kólinde oryn aldy. Sýǵa masań qalpynda túsken 1975 jyly týǵan er adam kólge batyp ketti. Onyń denesin aýyl adamdary taýyp, sýdan shyǵaryp aldy.
Baqytsyz jaǵdaılar demalys kúni Rýdnyı qalasynda da oryn aldy. Tobyldyń qala mańynan ótetin salasyna shomylýǵa barǵan 1978 jyly týǵan jumyssyz sýǵa túsý erejelerin, saqtyqty saqtamaǵannan qaıtyp jaǵaǵa shyqpady. Sýdan qutqarýshylar onyń denesin bir saǵattyń ishinde taýyp, jaǵaǵa shyǵardy.
«Jut jalǵyz bolmaıdy» degen, Tobylǵa sol kúni taǵy bir rýdnyılyq batyp ketti. Ishimdik iship alyp shomylǵan 1961 jylǵy azamat sýdyń qurbanyna aınaldy. Onyń denesin jergilikti turǵyndar sýdan shyǵardy.
Jalpy shomylý maýsymy bastalǵaly beri 9 adam ózen-kólderde ajal qushty.
Názıra Járimbetova.
Derek, sýret: egemen.kz