Búgingi býynnyń arasynda beınetten qashpaıtyndar da bar eken. Osydan 6 jyl buryn Syrdarııa aýdanynda 15 jumyssyz jas birigip brıgada qurǵanyn estigenbiz. Áýelgide «Basy taýdaı, aıaǵy qyldaı sharýanyń biri bolar. Jarnamasy jarqyldaǵan bastamanyń ańdysyn ańdıyq» degen de oı bolǵany ras.
Sol jyly aýyldan belsenip shyqqan 15 jas gektarlap baý-baqsha egip, ájeptáýir tabys taýypty. Kelesi jyly qatary kóbeıip, dán sepken alqaptary da ulǵaıa túsipti. Búginde osy eńbek brıgadalary qatarynda jumyssyz, NEET sanatyndaǵy, probasııa esebinde turatyn 200-ge jýyq jas jumys isteıdi. Talapty jastarǵa memleket tarapynan qoldaý da kórsetilip keledi. Máselen, egindik jer berilip, ony demeýshilik esebinen jyrtyp, egin alqabyn qorshaý men janar-jaǵarmaımen qamtamasyz etilgen.
Aýdandaǵy Amankeldi aýylynda da 2023 jyly osyndaı brıgada qurylypty. Osy kúni aýyldyń 10 balasy qaýyn-qarbyz, asqabaq, júgeri men kartop egip, ónimderin jınap jatyr. Jaz boıǵy eńbeginiń jemisin kúzde ótetin jármeńkelerde saýdaǵa shyǵarady. Talapshyl jastarǵa aýyl ákimdigi tarapynan egindik jer, aıaqsý jaǵynan qoldaý bar. Darııa deńgeıi tómendegeli beri olarǵa sorǵy berilip, eginin sýarýǵa jaǵdaı jasalyp keledi.
Aýyldyq okrýg ákimi apparatynyń ádiskeri, jastar isi jónindegi maman Beksultan Serikbaevtyń aıtýynsha, jastar qysta da jumyssyz qalmaıdy. Qoǵamdyq negizdegi jumystardan bólek, birazy jaldanbaly kásipke kóshedi. Kóktem shyǵa baý-baqshanyń qamyna qaıta kirisedi.
«Osy aýylda kóp jyldan beri egin egilmeı kelgen. 2021 jyldan bastap qana aýyl ákimdiginiń bastamasymen egin sharýashylyǵymen aınalysýǵa qadam jasaldy. Alǵashqyda 30 úı bastasa, qazir olardyń qatary 100 otbasynan asty. Osylardyń ishinde jastar brıgadasynyń orny bólek. Qataryna úlgi bolyp, eńbekten qashpaǵan jastar úshin jumyssyzdyq syltaý emes ekenin dáleldep keledi. Rústembek Áýbákirov, Ǵalymjan Janahmetov, Sharapat Ábdikárimov, Meıirhan Ishanbek sekildi jastardyń eńbegi kópke úlgi. Olardyń qatary jyldan-jylǵa artyp jatqany da qýantady», deıdi B.Serikbaev.
Amankeldimen qatar irgeles Aıdarly aýylynyń jastary da – «qystyń qamyn jazda oılaıtyndardyń» qatarynda. Alǵashynda 6 jigitten quralǵan top qatary jyl sanap tolyǵyp keledi. Maýsym kezinde ala tańnan jumysqa kirisetin olar baqshany aramshópten otap, sýarady, túbin birleıdi.
Aýdan jastarynyń basyn qosqan osyndaı brıgadalar búginde osy eki eldi mekennen bólek Jetikól, Besaryq, Shirkeıli, A.Toqmaǵanbetov aýyldarynda júıeli túrde uıymdastyrylǵan. Jobaǵa qatysqan 150-ge jýyq jas 60 gektar jerge kartop pen baqsha ónimderin egip, mol ónim jınap otyr.
Jalpy, keıingi jyldary Syr óńirinde jastardyń belsendiligi baıqalyp keledi. Mysaly, Jańaqorǵandaǵy «Jańarǵan Jańaqorǵan jastary» eriktiler tobyndaǵylardyń qatary búginde 300-den asypty. Kásipkerler men belsendi jastar múshe bolǵan eriktiler toby men aýdan turǵyndary birigip, muqtaj otbasylarǵa jańa úı kiltin tabystaýdy dástúrge aınaldyrǵan.
Sporttyq is-sharalar uıymdastyryp, qaıyrymdylyq, rýhanııat, bilim baǵytynda jumys isteıtin eriktiler toby 6 jyl ishinde 13 otbasyna úı syılapty. Osyndaı úzdik úlgi Qazaly jastaryna da tán. Olar da qıyndyqta qalǵan talaı jerlesterine qolushyn sozyp, birneshe márte asar ádisimen baspana salyp berdi.
Qyzylorda