Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Joldaýynda «Jasandy ıntellekt jáne sıfrlyq damý mınıstrligi qurylady. Úsh jyl ishinde Qazaqstan sıfrlyq el bolýy kerek» dep aıtty.
Elimizde Jasandy ıntellekt jáne sıfrlyq damý mınıstrligin qurý bastamasy – ýaqyt talabynan týǵan óte oryndy sheshim. Búginde jasandy ıntellekt pen sıfrlyq tehnologııalar ekonomıkanyń, ǵylymnyń, bilimniń, basqarý júıeleriniń damýynda negizgi qozǵaýshy kúshke aınaldy. Álemdik tájirıbe kórsetkendeı, mundaı strategııalyq salany úılestirip otyratyn derbes memlekettik organ eldiń ınnovasııalyq áleýetin arttyrady.
«Úsh jyl ishinde Qazaqstan sıfrlyq el bolýy kerek» degen maqsat – qoǵamdy jumyldyratyn, bolashaqqa naqty baǵdar beretin ambısııalyq mindet. Alaıda ony júzege asyrýǵa tek ınfraqurylym men tehnıkalyq sheshimder jetkiliksiz. Eń bastysy – adamı kapıtal. Halyqtyń sıfrlyq saýattylyǵyn arttyrý, mektepten bastap ýnıversıtetke deıingi deńgeıde jasandy ıntellekt negizderin oqytý, ǵalymdar men startaptarǵa jaǵdaı jasaý asa mańyzdy. Bul rette stýdentter, magıstranttar, doktoranttar arasynda jasandy ıntellekt salasyndaǵy daǵdylardy jan-jaqty damytýǵa, ulttyq ekonomıkanyń áleýetin ashýǵa baǵyttalǵan «AI-Sana» ınnovasııalyq jedeldetý baǵdarlamasy júzege asyp jatyr. Osy jobanyń aıasynda bizdiń ýnıversıtet stýdentterine «Cousera» onlaın platformasynan 1000 lısenzııa berildi.
«AI-Sana» sondaı-aq professor-oqytýshylar quramynyń biliktiligin arttyrýǵa baǵyttalǵan baǵdarlama. «AI-Sana» baǵdarlamasyndaǵy jasandy ıntellekt baǵyty boıynsha L.N.Gýmılev atyndaǵy Eýrazııa ulttyq ýnıversıteti – Astana qalasyndaǵy negizgi joǵary oqý orny.
Ýnıversıtetimizdegi barlyq bilim berý baǵdarlamalarynyń stýdentterine jasandy ıntellekt negizderin oqytý úshin, kólemi 36 saǵat «AI Bootcamp: Jasandy ıntellekt negizderi boıynsha ıntensıvti kýrs» atty jappaı ashyq onlaın kýrs ázirlenip, júzege asyrylyp jatyr. Kýrs sońynda sertıfıkat beriledi.
Sonymen qatar derekterdiń qaýipsizdigi, etıkalyq normalardy saqtaý, ulttyq tildik resýrstardy sıfrlandyrý sııaqty baǵyttarǵa erekshe nazar aýdarylyp otyr. Eger osy qadamdar keshendi túrde júzege assa, jaqyn arada sıfrlyq elge aınalamyz degen senimdemin.
Bıbigúl RAZAHOVA,
L.N.Gýmılev atyndaǵy Eýrazııa ulttyq ýnıversıteti Jasandy ıntellekt tehnologııalary kafedrasynyń meńgerýshisi