Joldaýda Memleket basshysy Qasym-Jomart Toqaev Torǵaı óńirine erekshe toqtalyp, Úkimetke bul óńirge aıryqsha nazar aýdarý kerektigin tapsyrdy. Buǵan deıin de Býrabaıda ótken tórtinshi Ulttyq quryltaıda prezıdent el damýy úshin strategııalyq mańyzy bar jańa bastamalardy jarııa etkeni barshamyzǵa belgili.
Solardyń qatarynda ortalyq jáne batys óńirler arasyn 560 shaqyrymǵa qysqartyp, Torǵaı óńiriniń damýyna tyń serpin beretin «Astana – Arqalyq – Torǵaı – Yrǵyz» baǵytymen avtokólik jobasyn salý bar. Osyǵan oraı bıyl mamyr aıynda Premer-mınıstr Arqalyqqa jasaǵan jumys saparynda «Ortalyq – Batys» kúre jolynyń qurylysyn bir aı merzimde bastaý jóninde naqty tapsyrma berip, maýsym aıynda Arqalyq pen Torǵaıda avtodáliz qurylysy bastaldy.
Alaıda osy úsh aıdyń ishinde atalǵan jobaǵa qatysty birqatar túsiniksiz jaǵdaı oryn alyp, alańdaýshylyq týdyrdy. Iаǵnı avtojol qurylysy is júzinde toqtap qaldy, memlekettik organdar Prezıdenttiń naqty tapsyrmasyn burmalap, balamaly baǵyttardy qarastyra bastaǵan. Máselen, Ulytaý oblysynyń aýmaǵynda Prezıdenttiń atap ótken baǵytynan ózge baǵytty zerdeleý maqsatynda qoǵamdyq tyńdaý ótkizýi halyqtyń narazylyǵyn týdyrdy. Prezıdent Joldaýyndaǵy Torǵaıǵa aıryqsha nazar aýdarý kerek degeni osy másele tóńiregindegi barlyq suraqqa núktesin qoıdy dep oılaımyn. Ortalyq – Batys dálizi «Astana – Arqalyq – Torǵaı – Yrǵyz» baǵyty boıynsha salynatynyna senimdimin. Ony ótken aptada Májiliste ótken alqaly jıynnan keıin Kólik mınıstri Nurlan Saýranbaev rastady. Torǵaıdyń damýy tutas eldiń ilgerileýine yqpal etetine senimdimiz.
Sondaı-aq Memleket basshysy Astanada vagon qurastyratyn zaýyt iske qosylǵanyn, avıasııa ınfraqurylymyn jańǵyrtýǵa da erekshe toqtaldy. Búginde Almaty, Shymkent, Qyzylorda qalalarynda jańa termınaldar ashyldy. Aldaǵy ýaqytta Zaısan, Qatonqaraǵaı, Kendirlide áýejaı qurylysy aıaqtalyp, Arqalyq áýejaıy qaıta jańǵyrtylady.
Prezıdenttiń aıtýynsha, bul bastamalar óńirlerdiń ekonomıkalyq belsendiligin arttyryp, jańa jumys oryndaryn ashady. Sondaı-aq ózge de salalardyń damýyna serpin berip, el ekonomıkasynyń órkendeýine úles qosady.
Berik BISENǴALIEV,
Májilis depýtaty